परिसीमन पर खरगेक पीएम मोदीकेँ फेर पत्र, 543 लोकसभा सीट 25 वर्ष धरि कायम रखबाक मांग
नई दिल्ली । समदिया
कांग्रेस अध्यक्ष मल्लिकार्जुन खरगे प्रधानमंत्री नरेंद्र मोदीकेँ पत्र लिखि प्रस्तावित परिसीमनकेँ लऽ कऽ सर्वदलीय बैठक बजाबऽ आ राजनीतिक दलसभ तथा राज्य सरकारसभकेँ प्रस्तावक विस्तृत अध्ययन लेल पर्याप्त समय देबाक मांग दोहरौने छथि। ओ लोकसभाक वर्तमान 543 सीट आ राज्यसभक बीच वर्तमान सीट-वितरणकेँ आगामी 25 वर्ष धरि कायम रखबाक सेहो आग्रह केलनि।
खरगे कहलनि जे परिसीमनसँ सम्बन्धित कोनो प्रस्ताव संसदमे पेश करबाक पहिने सभ राजनीतिक दल आ राज्य सरकारकेँ ओकर विस्तारसँ अध्ययन करबाक पर्याप्त अवसर भेटबाक चाही। हुनकर ई पत्र संसदीय कार्य मंत्री किरेन रिजिजूक संसदक विशेष सत्र बजाओल जा सकबाक संकेतक एक दिन बाद आएल अछि।
कांग्रेस अध्यक्ष अपन पत्रमे कहलनि जे ओ एहि विषयपर पहिनेसँ 16 जुलाई 2026 केँ प्रधानमंत्रीकेँ लिखि चुकल छथि। आब विशेष सत्रक सम्भावनाकेँ देखैत ओ अपन मांग फेर दोहरौने छथि। खरगेक अनुसार, परिसीमन देशक राजनीतिक प्रतिनिधित्व आ संघीय संरचनापर व्यापक प्रभाव डालि सकैत अछि, तेँ एहि विषयमे जल्दबाजी नहि होयबाक चाही।
*खरगेक तीन प्रमुख मांग”
– लोकसभाक वर्तमान 543 सीटक संख्या आगामी 25 वर्ष धरि कायम राखल जाए।
– राज्यसभकेँ लोकसभामे भेटल वर्तमान सीट-वितरण अगिला 25 वर्ष धरि नहि बदलल जाए।
– 2029 केर लोकसभा चुनावसँ महिलासभ लेल एक-तिहाई आरक्षण लागू कएल जाए।
खरगे प्रधानमंत्रीसँ आग्रह कयलनि जे परिसीमनक एहेन महत्वपूर्ण विषयपर सर्वदलीय सहमति बनाबऽ लेल पर्याप्त समय देल जाए आ राजनीतिक दलसभ तथा राज्य सरकारसभक विचार सुनल जाए। ओ कहलनि जे अप्रैल 2026 जेकाँ फेर जल्दबाजीमे विधेयककेँ आगाँ बढ़ेबाक प्रयास नहि कएल जाए।
जनतब जे 17 अप्रैल 2026 केँ लोकसभामे महिला आरक्षण आ परिसीमनसँ सम्बन्धित 131म संविधान संशोधन विधेयक जरूरी दू-तिहाई बहुमत नहि भेटबाक कारण पारित नहि भऽ सकल छल। विधेयकक पक्षमे 298 मत, जखनकि विरोधमे 230 मत पड़ल छल।
एहि पत्रक माध्यमसँ कांग्रेस अध्यक्ष परिसीमनक मुद्दापर व्यापक राजनीतिक विचार-विमर्श, राज्यसभक भागीदारी आ पर्याप्त अध्ययन-अवधिक मांगकेँ फेर जोरदार ढंगसँ उठौने छथि।
