पी-एच.डी. उपाधिसँ अलंकृत भेला पर डॉ. प्रवीण कुमार झाक अभिनंदन

मधुबनी समदिया!! मिथिलाक्षर साक्षरता अभियानक वरीय संरक्षक प्रवीण कुमार झाकें पी-एच.डी. उपाधिसँ अलंकृत भेला पर अभियान द्वारा रविदिन आयोजित 13म सम्मान समारोहमे हुनक भव्य अभिनंदन कयल गेल। कार्यक्रममे बतौर मुख्य अतिथि रीजनल सेकेंडरी स्कूलक निदेशक डॉ. राम शृंगार पांडेय मिथिलाक गौरवशाली परंपराक अनुरूप पाग आ दोपटा प्रदान क’ हुनक अभिनंदन कयलनि। अपन संबोधनमे ओ कहलनि जे मिथिलाक लाल पंचानन मिश्र एकटा व्यापक दृष्टि रखनिहार रचनाकार छलाह। एकटा लेखक, अनुवादक आ संपादक केर रूपमे मैथिली साहित्यक भंडारणमे हुनक योगदान बहुमूल्य अछि।

ललित नारायण मिथिला विश्वविद्यालयक मैथिली विभागाध्यक्ष प्रो. अशोक कुमार मेहताक कुशल मार्गदर्शनमे पंचानन मिश्रक जीवन ओ साहित्य विषय पर विश्लेषणात्मक अध्ययन क’ डॉ. प्रवीण कुमार झा द्वारा तैयार कयल गेल शोध प्रबंध आबयवाला पीढ़ी लेल अत्यंत उपयोगी होयत। मौका पर ज्योति रमण बाबा, प्रफुल्ल चंद्र झा, प्रीतम कुमार निषाद, डॉ.योगानंद झा, पं अजय नाथ झा ‘शास्त्री’, कुमार प्रमोद चंद्र, कृष्णकांत झा, शीतलांबर झा, दिलीप कुमार झा, आशीष कुमार मिश्र, परमानंद झा आदि प्रवीण कुमार झाक एहि सारस्वत कृत्यकें सराहनीय आ अनुकरणीय बतबैत हुनक मंगलमय भविष्यक कामना कयलनि।

कार्यक्रममे उग्रनाथ झा, दीपक आनंद मल्लिक, संजय झा आदि सहित मिथिलाक्षर साक्षरता अभियानक सैकड़ों अभियानी, मार्गदर्शक आ संरक्षक लोकनिक उल्लेखनीय उपस्थिति छलनि।