सफलता पूर्वक सम्पन्न भेल १३म मिथिलाक्षर साक्षरता अभियान एवं प्रथम MPPF COMPUTER EDUCATION केर दीक्षांत समारोह
मधुबनी समदिया!! प्रसिद्ध साहित्यकार डाॅ योगानंद झा, दरभंग केर अध्यक्षतामे मुख्य अतिथि रिजनल सेकेंडरी स्कूलक राम शृंगार पाण्डेय एवं विशिष्ट अतिथिगणमे शीतलांबर झा, दिलीप कुमार झा, ज्योति रमन झा बाबा, प्रफुल्ल चंद्र मिश्र, प्रीतम कुमार निषाद, कृष्ण कान्त झा, कुमार प्रमोद चंद्र, डाॅ प्रवीण कुमार झा, आशीष कुमार मिश्र, परमानंद झा, एडवोकेट कन्हैयाजी आदिक गरिमामय उपस्थितिमे समारोह भेल।
*
मैथिल पुनर्जागरण प्रकाश फोरम द्वारा संचालित उपक्रम मिथिलाक्षर साक्षरता अभियानक १३म एवं MPPF COMPUTER EDUCATION केर प्रथम दीक्षांत समारोह रविकेँ मधुबनीक शिक्षक संघ भवनमे सम्पन्न भेल। समारोहक अध्यक्षता कयलनि प्रसिद्ध साहित्यकार डाॅ योगानंद झा आ मुख्य अतिथिक रुपमे उपस्थित छलथि रिजनल सेकेंडरी स्कूलक चेयरमैन प्रसिद्ध शिक्षाविद राम शृंगार पाण्डेय आ कार्यक्रमक संचालन कऽ रहल छलथि चर्चित डाॅ प्रवीण कुमार झा।
पारंपरिक रूपसँ दीप प्रज्ज्वलितकेँ गोसाउनिक गीत ‘जय जय भैरवि’सँ समवेत प्रार्थनापूर्वक कार्यक्रमक श्रीगणेश भेल एवं मैथिलानी सिया-धिया लोकनि स्वागत गान ‘मंगलमय दिन आजु हे’सँ स्वागत कयलनि। तत्पश्चात मंचस्थ पाहुन लोकनिकेँ संस्थापक अजय नाथ झा शास्त्री पारंपरिक पाग-दोपटासँ सम्मानित कयलथि, जाहिमे छलथि -: प्रसिद्ध साहित्यकार डाॅ योगानंद झा, दरभंग अध्यक्षक रुपमे, मुख्य अतिथिक रुपमे रिजनल सेकेंडरी स्कूलक राम शृंगार पाण्डेय एवं विशिष्ट अतिथिगणमे शीतलांबर झा, दिलीप कुमार झा, ज्योति रमन झा बाबा, प्रफुल्ल चंद्र मिश्र, प्रीतम कुमार निषाद, कृष्ण कान्त झा, कुमार प्रमोद चंद्र, डाॅ प्रवीण कुमार झा, आशीष कुमार मिश्र, परमानंद झा, एडवोकेट कन्हैयाजी आदि। सम्मानक उपरांत शास्त्री सभगोटेकेँ मधुर वचनसँ स्वागत एवं अभिनन्दन कयलनि।
विषय प्रवेश कराबैत वास्त्री २०१३ इस्वीसँ चलल पुनर्जागरण यात्राक एखनि धरिक उपलब्धि पर संक्षिप्त प्रकाश दैत मैथिल पुनर्जागरण प्रकाश फोरमक निर्माण आ एहिमे समेटल १३टा उपक्रमक बारेमे बतौलनि। पुनः ताहिमे दूटा उपक्रमक ‘मिथिलाक्षर साक्षरता अभियान एवं MPPF COMPUTER EDUCATION केर जे दीक्षांत समारोह छल तकरा बारेमे बतबैत कहलनि जे मिथिलाक्षर साक्षरता अभियानक 307 टा बैच निकलि चुकल अछि आ आइ तकर १३म दीक्षांत समारोहमे लगभग २५ टा ‘मिथिलाक्षर प्रवीण’ उपस्थित छथि, जिनका सभकेँ प्रमाणपत्रसँ सम्मानित कयल जाएत आ तहिना MPPF COMPUTER EDUCATION केर DCA कोर्सक प्रथम बैचक लगभग उपस्थित 15टा उत्तीर्ण अभ्यर्थीकेँ प्रमाणपत्र एवं अंक पत्रसँ सम्मानित कयल जा रहल अछि।
मुख्य अतिथि प्रसिद्ध शिक्षाविद राम शृंगार पाण्डेय प्रतिभागीगणक उत्साह वर्धन करैत शिक्षाक प्रकाशक महत्ता बतौलनि आ तहिना कार्यक्रमक अध्यक्ष प्रसिद्ध साहित्यकार डाॅ योगानंद झा अपन अनुभवसँ प्रतिभागीणकेँ संबोधित करैत कहलनि जे सभ प्रकारक समस्याक समाधान संस्कारित शिक्षा होईत अछि। प्रसिद्ध समाजसेवी शीतलांबर झा मिथिला-मैथिलीक संघर्ष एवं उपाय पर प्रकाश डालैत अभ्यर्थीगणकेँ अपन माटिक लेल स्वाभिमान पूर्वक काज करय लेल प्रेरित कयलनि। ज्योति रमन झा बाबा प्रतिभागी गणक उज्जवल भविष्यक कामना करैत वर्तमान समयक संग अपन परंपराक निर्वहन पर प्रकाश देलनि। प्रसिद्ध साहित्यकार प्रीतम कुमार निषाद प्रतिभागीगणक मनोबल बढ़ाबैत कर्मठताक ज्ञान देलनि, तहिना प्रसिद्ध साहित्यकार दीलीप कुमार झा अपन ओजस्वी वाणीसँ प्रतिभागीगणमे उत्साहक संचार कयलनि। प्रसिद्ध समाजसेवी प्रफुल्ल चंद्र झा प्रतिभागीगणकेँ अपन समाज, क्षेत्र आ देशक लेल चरित्र निर्माण पर प्रकाश डालैत कुरितिक शमनक लेल क्रांतिकारी विचारक धारा प्रवाहित कयलनि, तहिना युवा अभियानी आशीष कुमार मिश्र एवं परमानंद झा समाज कल्याणक मार्ग देखौलनि एवं एडवोकेट कन्हैयाजी सभकेँ न्यायक अनुसरण करय लेल प्रेरित कयलनि। अभियानक वरिष्ठ संरक्षक कृष्ण कान्त झा अभियानी एवं प्रतिभागी गणकेँ अभियानमे सतत अपन सहभागिताक लेल प्रेरित कयलनि एवं फोरमक ट्रस्टी कुमार प्रमोद चंद्र शिक्षाक सूत्र बताबैत स्वचछ जीवन निर्माणक बात कहलनि।
कार्यक्रमकेँ चतुराईपूर्वक संचालन करैत प्रसिद्ध पत्रकार डाॅ प्रवीण कुमार झा प्रतिभागी गणकेँ शिक्षाक महत्व एवं आधुनिक युगक संग चलैत अपन धरोहरक रक्षा करैत सफल जीवन निर्माण पर प्रकाश देलनि। हुनका हुनक शोधक लेल हालमे डाॅक्टर उपाधिक उपलब्धि प्राप्त भेल अछि, ताहि लेल कार्यक्रममे हुनक अभिनंदन कयल गेल। तहिना MPPF COMPUTER EDUCATION केर शिक्षकगण क्रमशः नवल किशोर कुमार महतो, राकेश कुमार दास, संजय कुमार झा एवं कुन्दन आनंद झाकेँ सम्मानित कयल गेल। वरिष्ठ अभियानी उग्रनाथ झा, दीपक आनंद मल्लिक, मालती कुमारी, सरिता मिश्रा, अभिराम झा एवं दैनिक भास्करक पत्रकार संजय मिश्र आदिकेँ सेहो सम्मानित कयल गेल।
लगभग 70 गोटेकेँ उपस्थितिमे समस्त उत्तीर्ण प्रतिभागी गणकेँ प्रमाणपत्र एवं अंक-पत्र मुख्य अतिथि राम शृंगार पाण्डेय, अध्यक्ष डाॅ योगानंद झा, संस्थापक अजय नाथ झा शास्त्री एवं समस्त मंचस्थ पाहुनगण द्वारा सम्मानपूर्वक प्रदान कयल गेल। पुनः धन्यवाद ज्ञापन वरिष्ठ अभियानी उग्रनाथ झा कयलनि एवं समारोहक विराम देल गेल आ अल्पाहारक संग सफलतापूर्वक दीक्षांत समारोह सम्पन्न भेल।
