दरभंगा एम्सक लग जमीन विवादमे 10 सँ बेसी राउंड गोलीबारी, युवक घायल
दरभंगा । समदिया
बिशनपुर थाना क्षेत्रक पंचोभमे निर्माणाधीन एम्स लगमे निजी रूपसँ विकसित भऽ रहल स्मार्ट सिटी परिसरक करीब आठ कट्ठा जमीनकेँ लऽ बुधदिन दू पक्षक बीच जमि कऽ गोलीबारी भेल। घटनामे विजय भगत नामक युवक गोली लगलासँ गंभीर रूपसँ घायल भऽ गेल। हुनका इलाज लेल डीएमसीएच आनल गेल, जतयसँ बेहतर इलाज लेल निजी अस्पताल रेफर कएल गेल अछि।
घटनाक सीसीटीवी फुटेज सेहो सामने आयल अछि। फुटेजमे किछु युवक स्मार्ट सिटी परिसरमे प्रवेश कऽ बाइक, कुर्सी, दीवाल सहित अन्य सामानकेँ हटबैत आ तोड़फोड़ करैत देखाइ पड़ैत अछि।
बताओल जा रहल अछि जे आठ कट्ठा जमीनक खरीद-बिक्रीकेँ लऽ दुनू पक्षमे पहिनेसँ विवाद चलि रहल छल। बुधदिन विवाद हिंसक रूप लऽ लेलक आ दुनू पक्षक बीच 10 सँ बेसी राउंड गोली चलल। एहि दौरान विजय भगतकेँ गोली लागि गेल।
एम्स लगमे होएबाक कारण एहि इलाकाक जमीनक कीमत काफी बेसी बताओल जा रहल अछि। जमीन विवादमे कथित भूमाफिया नेटवर्कक चर्चा सेहो अछि, मुदा एकर आधिकारिक पुष्टि नहि भेल अछि।
घटनाक सूचना भेटिते बिशनपुर थाना पुलिस जाँचमे जुटि गेल अछि। पुलिस सीसीटीवी फुटेजक आधार पर घटनामे शामिल लोकक पहिचान करबाक प्रयास कऽ रहल अछि। गोलीबारीक वास्तविक कारण पुलिस जाँचक बाद स्पष्ट होएत।
