गुलवीर सिंह 5000 मीटरमे जीतलनि कांस्य, एशियन गेम्समे पदकक हैट्रिक

नई दिल्ली । समदिया

भारतीय धावक गुलवीर सिंह एशियन गेम्स 2026 मे पुरुष 5000 मीटर दौड़मे कांस्य पदक जीतैत अपन पदकक हैट्रिक पूरा कयलनि। ओ मंगलकेँ मिजुहो पार्क एथलेटिक स्टेडियममे 13 मिनट 32.75 सेकेंडमे दौड़ पूरा कय तेसर स्थान प्राप्त कयलनि।

बहरीनक बिरहानु बालेव 13:30.79 समयक संग स्वर्ण आ जापानक यामागुची तोमोनोरी 13:31.43 समयक संग रजत पदक जीतलनि।

एहि एशियन गेम्समे गुलवीर एकरासँ पहिने 10,000 मीटर आ 1500 मीटर दौड़मे रजत पदक जीतने छलाह। एहि उपलब्धिक संग ओ चारि दशक बाद एकहि एशियन गेम्स संस्करणमे तीनटा पदक जीतनिहार पहिल भारतीय एथलीट बनि गेलाह। हुनकासँ पहिने पीटी उषा 1986 मे चारिटा पदक जीतने छलीह।

गुलवीर 10,000 मीटर दौड़मे 28:29.38 मिनट आ 1500 मीटरमे अपन व्यक्तिगत सर्वोत्तम समय 3:36.72 मिनटक संग रजत पदक हासिल कयने छलाह। ओ 2023 हांग्जो एशियन गेम्समे 10,000 मीटर दौड़मे कांस्य पदक सेहो जीतने छलाह।

एहि बीच, महिला 800 मीटर दौड़मे भारतक पूजा ओल्ला 2:06.72 समयक संग सातम आ पुरुष 800 मीटरमे मोहम्मद अफसल पुलिक्कलाकाथ 1:48.27 समयक संग आठम स्थान पर रहलाह। जापानक को ओचियाई 1:44.48 समयक संग पुरुष 800 मीटरमे स्वर्ण जीतैत एशियन गेम्सक नव रिकॉर्ड बनौलनि। ओ ईरानक सज्जाद मोरादीक 16 वर्ष पुरान 1:44.74 समयक रिकॉर्ड तोड़लनि।