गयाजीमे शुरू भेल एहि सालक पितृपक्ष महासंगम, मुख्यमंत्री द्वारा उद्घाटन
गयाजी । समदिया
विश्वप्रसिद्ध पितृपक्ष मेला महासंगम-2026 केर शुभारंभ शुक्रदिन गांधी मैदान स्थित टेंट सिटीमे भव्य समारोहक संग होएबाक जनतब अछि। 25 सितंबरसँ 10 अक्टूबर धरि चलऽवला एहि मेला लेल विष्णु नगरी गयाजीकेँ आकर्षक ढंगसँ सजाओल गेल अछि। देश-विदेशक लाखों श्रद्धालुक स्वागत लेल प्रशासन आ संबंधित विभाग सभ तैयारी पूरा कए लेने अछि।
मुख्यमंत्री सम्राट चौधरी टेंट सिटीमे मेलाक औपचारिक उद्घाटनक जनतब अछि। एहिसँ पहिने हुनका द्वारा विष्णुपद मंदिरमे पूजा-अर्चना आ देवघाट सहित मेला क्षेत्रक तैयारिक निरीक्षणक समाचार अछि। समारोहमे केंद्रीय मंत्री जीतन राम मांझी, उपमुख्यमंत्री विजय कुमार चौधरी, मंत्री विजय कुमार सिन्हा, विधानसभा अध्यक्ष डॉ. प्रेम कुमार, मंत्री बिजेंद्र प्रसाद यादव सहित जनप्रतिनिधि आ अधिकारी सभख उपस्थितक जनतब अछि।
पितृपक्षक पहिल दिनसँ त्रैपाक्षिक गया श्राद्ध सेहो शुरू होएत। देशक विभिन्न भागसँ पिंडदानी गयाजी पहुँचि रहल छथि। श्रद्धालु पुनपुन नदी अथवा गोदावरी तालाबसँ कर्मकांड शुरू कए विभिन्न वेदी पर पिंडदान आ तर्पण करताह।
फूल-रोशनीसँ सजल विष्णु नगरी
विष्णुपद मंदिरसँ चांदचौरा धरि मार्गकेँ फूल आ रंग-बिरंगी रोशनीसँ सजाओल गेल अछि। मेला क्षेत्र, फल्गु नदीक घाट आ प्रमुख धार्मिक स्थल सभक विशेष साफ-सफाई कराओल गेल अछि। मंदिर परिसरमे भजन, प्रवचन आ भागवत कथा लेल पंडाल बनाओल गेल अछि।
देवघाट पर लेजर शोसँ देखाओल जा रहल गयाजीक महिमा
श्रद्धालु सभकेँ गयाजी केर धार्मिक आ पौराणिक महत्वसँ परिचित कराबऽ लेल फल्गु नदीक देवघाट पर विशेष लेजर शो शुरू कएल गेल अछि। एहि माध्यमसँ गयाजी केर महिमा, फल्गु नदीक महत्व आ पिंडदानक प्राचीन परंपराकेँ आधुनिक तकनीकसँ प्रस्तुत कएल जा रहल अछि।
