कोटामे कोटा हमर अधिकार, ककरो धमकीसँ डरयवाला नहि : संतोष सुमन

गरीब चौपाल यात्रामे जीतन राम मांझी आ संतोष सुमनक आरक्षणमे वर्गीकरण आ राजनीतिक हिस्सेदारी पर जोर

मोतिहारी । समदिया

हिन्दुस्तानी आवाम मोर्चा (से.) केर ‘गरीब चौपाल यात्रा’क तहत मोतिहारीक बापू सभागारमे आयोजित कार्यक्रममे हजारोंक संख्यामे गरीब, वंचित आ महादलित समाजक लोक सहभागी भेलाह। एहि दौरान पूर्व मुख्यमंत्री आ केंद्रीय एमएसएमई मंत्री जीतन राम मांझी तथा पार्टीक राष्ट्रीय अध्यक्ष आ बिहार सरकारक लघु जल संसाधन मंत्री संतोष कुमार सुमन गरीब-वंचित समाजक अधिकार, सम्मान आ राजनीतिक हिस्सेदारीक लेल एकजुट हेबाक आह्वान कयलनि।

जीतन राम मांझी कहलनि जे गरीब, वंचित आ शोषित समाजक सभसँ पैघ ताकति ओकर एकजुटता अछि। आजादीक लगभग 80 वर्षक बादो जँ समाजक पैघ हिस्सा अपन अधिकार आ उचित हिस्सेदारी लेल संघर्ष करय लेल बाध्य अछि, तँ ई गंभीर चिंताक विषय अछि।

मांझी आरक्षणमे वर्गीकरणक पक्षमे अपन समर्थन दोहरबैत कहलनि जे 1 अगस्त 2024 केँ सर्वोच्च न्यायालय द्वारा एससी-एसटी आरक्षणमे वर्गीकरणसँ संबंधित देल गेल फैसलाक बाद कर्नाटक, आंध्र प्रदेश, हरियाणा, पंजाब आ तमिलनाडु जेकाँ राज्यसभमे एहि दिशामे कदम उठाओल जा रहल अछि। एहेन स्थितिमे बिहारमे आरक्षणक भीतर वर्गीकरण लागू करयमे कठिनाई नहि हेबाक चाही।

ओ कहलनि जे आरक्षणक लाभ पहिने पाबि चुकल किछु लोककेँ वर्गीकरणसँ आपत्ति भऽ सकैत अछि, मुदा हुनकर लड़ाइ ओहि 18 महादलित जाति आ अन्य वंचित वर्गक लेल अछि, जे एखनि धरि आरक्षणक अपेक्षित लाभसँ वंचित छथि। वंचित वर्गकेँ उचित हिस्सा नहि भेटत ताबति धरि संघर्ष जारी रहत।

ओतहि संतोष कुमार सुमन कहलनि जे हिन्दुस्तानी आवाम मोर्चा समाजक ओहि लोकक आवाज अछि, जे सभसँ नीचाँक पायदान पर ठाढ़ छथि आ जिनकर आवाज सत्ताक गलियारा धरि सहजतासँ नहि पहुँचैत अछि। गरीब समाजक बच्चासभकेँ नीक शिक्षा, रोजगार आ सम्मानक संग आगाँ बढ़बाक अधिकार अछि। गरीब समाजसँ विधायक आ जनप्रतिनिधि बनबाक अधिकार सेहो समान रूपसँ अछि।

सुमन कहलनि, “कोटामे कोटा देबय पड़त, ई हमर अधिकार अछि। हम ककरो धमकीसँ डरयवला नहि छी। ई लड़ाइ ककरो अधिकार छीनबाक लेल नहि, बल्कि जे लोक वर्षोसँ आरक्षणक लाभसँ वंचित छथि, हुनका उचित हक आ हिस्सेदारी दिआबय लेल अछि। हम अपन अधिकारक लड़ाइ लोकतांत्रिक तरीकासँ मजबूतीक संग लड़ब आ अपन हक लऽ कऽ रहब।”

ओ “जकर जतेक संख्या, तकर ओतेक हिस्सेदारी” केर सिद्धांतक आधार पर राजनीतिक भागीदारी सुनिश्चित करबाक मांग कयलनि। सुमन गरीब-वंचित समाजसँ अपन संख्याकेँ राजनीतिक शक्तिमे बदलबाक आ केवल वोट देनिहार नहि, बल्कि सत्ता आ शासनमे उचित हिस्सेदारी हासिल करबाक लेल संगठित होबाक आह्वान केलनि।

सुमन कहलनि जे पार्टी गरीबक समस्या लऽ कऽ लगातार हुनका सभक बीच जाएत। लोक अपन समस्यासँ संबंधित आवेदन पार्टीकेँ दऽ सकैत छथि। पार्टीक टीम आवेदनसभकेँ संबंधित अधिकारी धरि पहुँचाओत आ जरूरत पड़लापर अधिकारीसभसँ बातचीत आ पत्राचार करत।

कार्यक्रमक दौरान कहल गेल जे चंपारणक ऐतिहासिक धरतीसँ आब गरीबक राजनीतिक एकता आ अधिकारक नव आवाज बुलंद भऽ रहल अछि। संतोष सुमन कहलनि, “समय बदलि रहल अछि, गरीबक समय आबयवला अछि। एकर शुरुआत भऽ चुकल अछि।”

कार्यक्रममे पार्टीक प्रदेश अध्यक्ष डॉ. अनिल कुमार, प्रधानमहासचिव राजेश पाण्डेय, मुख्य राष्ट्रीय प्रवक्ता श्याम सुन्दर शरण, विधायक रोमित कुमार सिंह, विधायक प्रफुल्ल मांझी सहित पार्टीक अनेक पदाधिकारी, कार्यकर्ता आ समर्थक उपस्थित छलाह। हजारों लोक गरीब, वंचित आ महादलित समाजक अधिकार, कोटामे कोटा आ राजनीतिक हिस्सेदारीक लड़ाइकेँ मजबूत करबाक संकल्प लेलनि।