नेपालमे बाढ़िक बाद आपदा मंत्री, कहलनि – ‘गंडकक जलस्तर सामान्य, स्थिति नियंत्रणमे’

सीतामढ़ी । समदिया

नेपालमे लगातार भऽ रहल भारी वर्षाक बाद आयल बाढ़िक असरि बिहारक सीमावर्ती जिलासभमे सेहो देखबाक लेल भेटि रहल अछि। एहि बीच बिहार सरकारक आपदा प्रबंधन मंत्री रत्नेश सादा रविदिन सीतामढ़ी पहुँचलाह। ओ समाहरणालय स्थित विमर्श कक्षमे जिलाक सभ विभागक अधिकारीसभक संग बैठक कऽ नेपालसँ आयल बाढ़ि आ जिलामे उत्पन्न परिस्थितिक समीक्षा कएलनि।

बाढ़िक स्थिति आ प्रशासनिक तैयारीक समीक्षा

समीक्षा बैठकमे मंत्री संभावित बाढ़िक खतरा, भेल क्षति, प्रशासनिक तैयारी तथा प्रभावित क्षेत्रमे सुरक्षा व्यवस्थाक संबंधमे अधिकारीसभसँ जानकारी लेलनि। बैठकक बाद मंत्री कहलनि जे बिहारमे जाहि तरहक भयावह परिस्थितिक चर्चा भऽ रहल अछि, फिलहाल ओहन स्थिति देखबामे नहि आयल अछि।

सभ बाढ़ प्रभावित क्षेत्र सुरक्षित

रत्नेश सादा कहलनि जे बिहारक सभ बाढ़ि प्रभावित क्षेत्र फिलहाल सुरक्षित अछि। मुदा संभावित कोनो परिस्थितिसँ निपटबाक लेल राज्य सरकार आ जिला प्रशासन पूर्ण रूपसँ तैयार अछि। नेपालमे आयल बाढ़ि आ भारी वर्षाक बाद सीमावर्ती क्षेत्रक स्थिति पर लगातार नजरि राखल जा रहल अछि।

अलर्ट मोडमे प्रशासन

मंत्री कहलनि जे सरकारक प्राथमिकता लोकक सुरक्षा अछि। एहि लेल राज्यक सभ जिलामे व्यापक व्यवस्था कएल गेल अछि। प्रशासनिक अधिकारीसभकेँ अलर्ट मोडमे राखल गेल अछि, जाहिसँ कोनो आपात परिस्थिति उत्पन्न भेलापर तत्काल राहत आ बचाव कार्य शुरू कएल जा सकय।

 

26 तारीखकेँ नेपालमे जे बाढ़ि आयल छल, ताहिसँ बिहारक कतेको जिलाक लेल खबर छल, ओहेन स्थिति नहि अछि। गंडक नदीमे सेहो पानि सामान्य अछि। तैयो हमर सभक तैयारी पूरा अछि। राति-दिन जनता सभक सुरक्षाक लेल लागल छी।”

नेपालक स्थिति पर सेहो नजरि

सीतामढ़ी भारत-नेपाल सीमासँ सटल जिला अछि। नेपालक जलग्रहण क्षेत्रमे होइत भारी वर्षाक सीधा असरि जिलाक नदीसभ आ सीमावर्ती क्षेत्र पर पड़ैत अछि। एहि कारणेँ नेपालक मौसमक स्थिति आ ओतयसँ आबि रहल पानिक लगातार निगरानी कएल जा रहल अछि।

बैठकमे अधिकारीसभ मंत्रीकेँ जिलाक वर्तमान स्थिति, संभावित बाढ़िक खतरा आ प्रशासनिक तैयारीक संबंधमे विस्तृत जानकारी देलनि।

अफवाह पर ध्यान नहि देबाक अपील

आपदा प्रबंधन मंत्री लोकसभसँ अपील कएलनि जे बाढ़िक संबंधमे कोनो प्रकारक अफवाह पर विश्वास नहि करथि। प्रशासन द्वारा जारी आधिकारिक सूचनाक आधारे पर भरोसा करथि।

मंत्री कहलनि जे सरकार आ प्रशासन स्थिति पर लगातार नजरि रखने अछि आ आवश्यकता पड़लापर तत्काल जरूरी कदम उठाओल जाएत। ओ लोकसभसँ प्रशासनक निर्देशकेँ पालन करबाक अपील सेहो कएलनि। यदि कोनो क्षेत्र खाली करबाक अथवा सुरक्षित स्थान पर जयबाक निर्देश देल जाए, तँ लोकसभसँ प्रशासनकेँ सहयोग करबाक आग्रह कएलनि।