इजरायलक पीएम नेतन्याहूक यहूदी नववर्ष पर दुश्मनकेँ चेतौनी, कहलनि-‘हमरासँ उलझबाक कोशिश कथमपि नहि’
नई दिल्ली । समदिया
यहूदी नववर्ष ‘रोश हशनाह’क अवसर पर इजरायलक प्रधानमंत्री बेंजामिन नेतन्याहू अपन उपलब्धिक उल्लेख करैत विरोधी सभकेँ सीधा चेतौनी देलनि। ओ कहलनि, “हमरासँ उलझबाक कोशिश कथमपि नहि करब। जँ अहाँ सभ किछु सीखने छी तँ ई सीखू जे हमरासँ नहि उलझू।”
तेल अवीव स्थित किर्यामे रक्षा मंत्री इजरायल काट्ज, आईडीएफ प्रमुख लेफ्टिनेंट जनरल एयाल जमिर आ सेनाक वरिष्ठ अधिकारी सभक संग नववर्ष समारोहमे नेतन्याहू ई बात कहलनि। कार्यक्रमक जानकारी ओ सोशल मीडिया प्लेटफॉर्म ‘एक्स’ पर साझा कयलनि।
नेतन्याहू कहलनि जे ‘वॉर ऑफ रिडेम्पशन’, ‘ऑपरेशन रोअरिंग लायन’ आ ‘ऑपरेशन राइजिंग लायन’क दौरान हासिल उपलब्धि ऐतिहासिक अछि आ एहिसँ इजरायलक अस्तित्वक सुरक्षा मजबूत भेल अछि।
ओ दावा केलनि जे इजरायल एहेन शासनसँ विनाशक खतराक सामना करैत छल, जे इजरायलकेँ समाप्त करय चाहैत छल आ परमाणु बम हासिल करबाक प्रयासमे छल। इजरायल एहि खतरा सहित अन्य खतराकेँ पाछाँ धकेलि देने अछि।
नेतन्याहू कहलनि जे उक्त शासन आब पहिनेसँ बेसी कमजोर अछि आ अपन अस्तित्वक लड़ाइ लड़ि रहल अछि। ओ इजरायली सेना, पायलट, सुरक्षा तंत्र आ देशक एकतापर भरोसा जतबैत कहलनि जे एहि खतराकेँ स्थायी रूपसँ समाप्त करबाक लक्ष्य आब दूर नहि अछि।
ओ कहलनि जे इजरायल लग शक्ति, दृढ़ संकल्प आ आंतरिक एकता अछि, जाहिसँ ओ सभ चुनौतीक सामना कऽ सकैत अछि। अंतमे नेतन्याहू इजरायलक नागरिक सभकेँ नववर्षक शुभकामना देलनि।
