अहाँक आस्थाक सम्मान बाबर-औरंगजेबमे आस्था रखनिहार लोक नहि कऽ सकैछ : सीएम योगी

मथुरा । समदिया

उत्तर प्रदेशक मुख्यमंत्री योगी आदित्यनाथ शुक्रकेँ श्रीकृष्ण जन्माष्टमीक अवसर पर विपक्ष पर जोरगड़ हमला करैत कहलनि जे जिनकर सभक आस्था बाबर आ औरंगजेबमे अछि, ओ लोक सनातन आ देशक आस्थाक सम्मान नहि कऽ सकैत छथि। ओ कहलनि जे एहेन लोक समाजमे विष घोरबाक संग युवा, बहिन-बेटीक सुरक्षा, किसान आ उद्यमीक हितकेँ नुकसान पहुँचयबयक प्रयास कऽ सकैत छथि, मुदा डबल इंजनक सरकार हुनकर मंसूबाकेँ सफल नहि होमऽ देत।

सीएम योगी श्रीकृष्ण जन्मभूमि मंदिर पहुँचि भगवान श्रीकृष्णक पूजा-अर्चना कयलनि आ प्रदेशवासीकेँ जन्माष्टमीक शुभकामना देलनि। जन्मस्थान परिसरमे करीब 30 मिनट रहलाक दौरान ओ श्रद्धालुसभ पर पुष्पवर्षा सेहो कयलनि।

श्रद्धालुसभकेँ संबोधित करैत योगी कहलनि जे सरकारक आस्था श्रीकृष्ण कन्हैया, प्रभु श्रीराम, बाबा विश्वनाथ आ मां विंध्यवासिनीमे अछि। मुदा जिनकर आस्था बाबर आ औरंगजेबमे अछि, की ओ लोक अहाँक आस्थाक सम्मान कऽ सकत ? हुनकर कहब छल जे एहेन लोकक आदति समाजमे विष घोरबाक रहल अछि।

मुख्यमंत्री कहलनि जे सनातन आस्थाकेँ समाप्त करबाक अनेक बेर प्रयास भेल, मुदा केओ सफल नहि भेल। अयोध्यामे करीब 500 वर्ष पहिने विदेशी आक्रांतासभ आस्थाकेँ समाप्त करबाक प्रयास कयने छल, मुदा आइ हुनकर नामो लेनिहार केओ नहि अछि।

योगी कहलनि जे सरकार अयोध्या आ काशीक तर्ज पर मथुरा-वृंदावनक भव्य विकास करबाक लेल प्रतिबद्ध अछि। मथुरा, नंदगांव, बरसाना, गोवर्धन आ वृंदावन सहित पूरा ब्रज क्षेत्रक विकास लोकक भावना अनुरूप कयल जाएत।

ओ पिछला सरकारसभ पर वोट बैंकक राजनीति करबाक आरोप लगबैत कहलनि जे पहिने सरकार ब्रजमे आबयसँ डरैत छल। ओहि समय जवाहरबाग जेकाँ घटना भेल, मुदा आब ब्रजमे रंगोत्सव आ ब्रजराज उत्सव जेकाँ आयोजन भऽ रहल अछि।

मुख्यमंत्री कहलनि जे भगवान श्रीकृष्णक संदेश आइयो प्रासंगिक अछि – कर्तव्यक पथ पर चलैत देश, सनातन आ मानवताक लेल काज करब। प्रधानमंत्री नरेंद्र मोदीक नेतृत्वमे देशमे विरासत आ विकासक अद्भुत समन्वय देखबा लेल भेटि रहल अछि। सरकारक प्रयास अछि जे आस्थाक प्रमुख केंद्रसभकेँ भव्य स्वरूप देबाक संग विकासक गति सेहो तेज कयल जाए।