सदर थाना क्षेत्रक भारतीय नगरमे शनि कऽ दिन देखार चारिसँ पांच राउंड फायरिंग केर घटनाक कारण लोकमे आतंक पसरल अछि। एहि फायरिंगमे एकटा 16 वर्षीय बुच्ची पूनम कुमारी केर हाथ आ बाँहिमे दू गोली लगलासँ घायल भऽ गेलीह। हुनक सदर अस्पतालमे इलाज भऽ रहल अछि। घटनाक संबंधमे पूनम कुमारी बतौलनि जे दिनमे 12 बजे अचानक चारि-पाँच युवक आतंक पसारय केर उद्देश्यसँ हमर घरक सामने गोलीबारी करय लगलाह। ओही समय हमर माँ घरक दरबज्जा बंद करबाक लेल कहलक।जखन हम अपन घरक दरबज्जा बन्न करय लगलहुँ तखन युवक द्वारा चलाओल गेल दू टा गोली हमर हाथ आ बाँहिमे लागल जाहिसँ हम बहुत घायल भ’ गेलहुँ। पीड़िताक पिता विनोद शर्मा कहलनि जे सोनू नामक युवक कुमार कोरेक्स खांसीक सिरप पैघ पैमाना पर बेचैत छथि। हम आ समाजक अन्य लोक मंदिर लग कोरेक्स बेचयसँ मना कयलौंह आ कहलौं जे मंदिर लग कोरेक्स बेचब ठीक नहिं अछि।एहि पर सोनू आ ओकर माता-पिता सेहो उपस्थित लोककेँ गारि-गरौबलि आ धमकी देलक। जखन कि सोनू आन लड़का सबकेँ फोन कयलक आ फायरिंग केश्र घटना कयलक।
आगा ओ कहलनि जे आइयो बजरंगबली मंदिर लग कोरेक्स बिका रहल छल। हमर घर मंदिर लग अवस्थित अछि।जखन हम कोरेक्स बेचयसँ मना कयलौंह, ओ अपन अन्य सहयोगीक संग फायरिंग केर घटनाक अंजाम देलक, जाहिमे हमर बेटी घायल भऽ गेल। ओ कहलनि जे एहि घटनाक सूचना पुलिसकेँ देल गेल छल। ओतहि पुलिस सेहो मौका पर जा कऽ घटनाक जांच कऽ रहल अछि।सदर थाना प्रभारी श्री राम सिंह कहलनि जे, मामिलाक जांच भऽ रहल अछि, एहि घटनामे शामिल अपराधीकेँ गिरफ्तार करय लेल सेहो छापामारी कयल जा रहल अछि।
