राष्ट्रपतिक संग युवा साहित्यकार केर बातचीतक कार्यक्रममे गुंजन श्री केर चयन पर मैथिल साहित्यिक समुदायमे खुशी व्याप्त अछि। राष्ट्रीय राजधानी नई दिल्लीमे १० सँ १८ फरवरी धरि आयोजित होमय वाला विश्व पुस्तक मेलाक संदर्भमे नेशनल बुक ट्रस्ट राष्ट्रपतिक संग युवा साहित्यकार सभसँ बातचीत करत। संवाद कार्यक्रममे देशक विभिन्न भाषाक किछु चयनित साहित्यकारमे मैथिली भाषाक युवा साहित्यकार गुंजन श्री केर चयन कयल गेल अछि। अहाँ सभकेँ बताबैत चली जे एहि युवा सभक संवाद कार्यक्रम राष्ट्रपतिक संग लेखकक आयोजन १२ फरवरी केर राष्ट्रपति भवनमे कयल जायत ।गुंजन श्री मूल रूपसँ मधुबनी जिलाक बेनीपट्टी प्रखंड क्षेत्र अंतर्गत रामनगरक निवासी बीएनएमयूक प्रोफेसर मैथिलीक चर्चित साहित्यकार कमल मोहन चुन्नूक पुत्र छथि, जे वर्तमानमे मैथिली मीडिया हाउसमे कार्यकारी अधिकारीक रूपमे कार्यरत गुंजन मैथिली भाषाक समकालीन साहित्यमे युवा लेखनीमे अग्रणी साहित्यकार छथि। एखन धरि हिनक तीन टा पोथी ‘प्रेमक टाइमलाइन’, ‘तरहठी पर समय’ आ ‘भारतीय स्वतंत्रता आन्दोलनमे मिथिलाक दलित समाजक योगदान प्रकाशित भ’ चुकल अछि। जखन कि हुनक चारिम पोथी ‘मर्सी’ जे यात्रा संस्मरण अछि, केर प्रकाशन प्रक्रिया चलि रहल अछि। एकर अलावा गुंजन विश्व आर्थिक मंच केर क्यूरेटर रहि आ यूरोपक १४ देशक दौरा कय वार्षिक क्यूरेटर मीटमे भारत सहित मिथिला समुदायक प्रतिनिधित्व कय चुकल छथि । एहि उपलब्धि पर मैथिलीक लेखक ओ साहित्यकारसभमे उदय चन्द्र झा विनोद, डा योगानंद झा, धर्मेन्द्र कुमार झा, प्रवीण कुमार झा, लक्षमण झा सागर, डाॅ विष्णुकान्त मिश्र, अजीत आजाद, आनंद मोहन झा, अक्षय आनंद सनी, मैथिल प्रशांत, कमलेश प्रेमेन्द्र, मो.मुख्तार आलम, शैलेन्द्र शैली, विभा झा, दिलीप कुमार चौधरी, दिलीप कुमार झा, भोगेन्द्र शर्मा, संजीव कश्यप आदि लोकनि बधाई आ शुभकामना देलनि अछि।
