राष्ट्रीय जनता दल आ विकासशील इन्सान पार्टीक लोकसभा चुनावसँ पहिने बिहारमे सहमति बनि गेल अछि। एहि संबंधमे तेजस्वी यादव प्रेसकेँ संबोधित कयलनि। एहि दौरान मुकेश सहनी सेहो ओतय उपस्थित छलाह। एहि दौरान तेजस्वी यादव मुकेश सहनीकेँ पैघ भाइ कहि सम्बोधित कयलनि।
लोकसभा चुनावसँ पहिने पत्रकार सम्मेलनमे तेजस्वी यादव, मनोज झा आ मुकेश सहनी उपस्थित छलाह। वास्तवमे, २०२० मे विधानसभाक दौरान तेजस्वी यादवक सङ्ग एकटा संवाददाता सम्मेलनमे मुकेश सहनी पीठमे छुरा घोंपबाक आरोप लगबैत पीसीक बहिष्कार कय देने छलथि। ओना, आब ओ राजदमे शामिल भऽ गेल छथि। तेजस्वी यादव प्रेसकेँ संबोधित करैत कहलनि, “मुकेश सहनी हमर बड़का भाई छथि।”
तेजस्वी यादव आगू कहलनि जे हम गठबंधनमे मुकेश सहनीकेँ स्वागत करैत छी। अति पिछड़ा समाजकेँ जोड़बाक लेल इ कठिन परिश्रम कयलनि अछि। भाजपा हुनकर पार्टीकेँ तोड़य केर कोशिश कयलक। जे सभ चिचिया रहल छथि ४०० केर पार, एहि बेर बिहारक धरती चौंकाबयवाला परिणाम देत। देशमे तानाशाही रवैया अपनाओल जा रहल अछि। देशमे संविधान खतरामे अछि। “गयामे भाजपाक एकटा आन्तरिक बैसारमे भाजपाक एकटा नेता मंत्री प्रेम कुमारक सोझाँ कहैत छथि जे हमरासभकेँ प्रचंड बहुमत चाही, हम संविधानकेँ बदलि देब। कोनो मायक लालमे ताकत नहिं जे संविधानकेँ बदलि देत।”
तेजस्वी यादव आगू कहलनि जे दक्षिण भारत, राजस्थानक नेता लोकनि सेहो एहने बयान देलनि अछि। आइ हम बहुत खुश छी जे मुकेश सहनी गठबंधनमे शामिल भऽ गेलाह। हुनकर स्वागत अछि। गठबंधनमे सीटक घोषणा पहिनेसँ भऽ चुकल अछि। पहिने तय भेल छल जे राजद २६ सीट पर चुनाव लड़त। २६ सीटमे सँ 3 सीट मुकेश सहनीकेँ देल जायत। मुकेश सहनीक पार्टी विकासशील इन्सान पार्टी गोपालगंज, झंझारपुर आ मोतिहारीसँ चुनाव लड़त। ओ कहलनि जे ई गठबंधन लोकसभाक सङ्ग-सङ्ग विधानसभा चुनावक लेल सेहो अछि।
मुकेश सहनी एहि दौरान कहलनि जे ओ २०२४ केर चुनावमे मजबूतीसँ चुनाव लड़ताह। बिहारक ४० लोकसभा सीटमे सँ ४० सीट जीतब। ओ कहलनि जे भाजपा २ करोड़ लोककेँ रोजगार देबाक वादा कयलक मुदा एखन धरि २ लाख लोककेँ रोजगार नहिं देल गेल अछि। अहां पहिने सेहो समर्थन कएने छलहुँ, हम एक बेर फेर अहांक संग छी। दूटा भायक आपसमे बहस होइत अछि। ई ने तऽ हमरा लेल नीक छल आ ने तेजस्वी जीक लेल। दुनूकेँ नोकसान भेल। मुदा जे हमरा सभक छातीमे खंजर मारलक, विधायक तोड़ि देलक, आइ हुनका सभसँ बदला लेबाक समय अछि।
