चुनाव रणनीतिकार आ जन सुराजक सूत्रधार प्रशांत किशोर एकटा पैघ दावा कयलनि अछि।
आबयवाला बिहारक विधानसभा चुनावमे भाजपा आ इंडिया गठबंधन दुनूक समक्ष प्रशांत किशोर एकटा तेसर सशक्त दावेदार अपन जन सुराज पार्टीक रुपमे रहताह। तकर तैयारी प्रशांत किशोर बहुत पहिनेसँ शुरू कय चुकल छथि आ अपन बयानक माध्ममसँ चर्चामे बनल रहैत छथि।
आब प्रशांत किशोर सोमकेँ कहलनि कि, लोकसभ बतौलक जे बिहारमे सबसँ बेसी परेशान बुजुर्ग छथि, जे मजदूरक रूपमे सेहो काज नहिं कऽ सकैत छथि। ओ वादा कयलनि जे यदि जन सुराज सत्तामे अबैत अछि तँ ६० वर्षसँ बेसी आयुक महिला आ पुरुषक लेल प्रति मास २,००० रुपैया पेंशनक व्यवस्था कयल जायत।
प्रशांत किशोर कहलनि जे एहि बेर हम एकटा संकल्प लऽ कऽ आयल छी। हम कोनो नेता वा पार्टीक हाथ नहिं पकड़ने छी, अहांक बच्चाक हाथ पकड़ने छी। दू सालमे जहिना अहाँ दही केर मथि कए मक्खन निकालैत छी, तहिना समाज केर मथि कऽ, बिहार केर मथि कऽ एहन लोक सभकेँ बाहर निकालब, जकरा अहाँ अपन आशीर्वाद आ वोटसँ जीता कऽ लाउ आ जनताक राज बनाउ। दू सालमे जनताक राज बनत। पीके कहलनि जे हमर पहिल संकल्प अछि जे नाली-गली बनय वा नहिं बनय, स्कूल अस्पताल जखनि सुधरय, मुदा एक सालक भीतर अहाँक घरसँ जतेक लोक बाहर कमाइ लेल गेल छथि आ अहाँक गाममे जतेक युवा बेरोजगार बैसल छथि, हुनका सभक लेल कमसँ कम १० सँ १५ हजारक रोजी-रोजगार बिहारमे देल जायत।
प्रशांत किशोर लोकसभसँ आगू पूछलनि जे अगिला बेर वोट रोजगारक लेल होयबाक चाही आ कि पाँच किलो अनाजक लेल ? एहि पर लोक सभ कहलनि रोजगार। एहि दौरान प्रशांत किशोर एकटा आओर सवाल पुछलनि जे की अहाँ अपन बच्चाक लेल शिक्षा चाहैत छी वा अहाँ अपन जातिक नेता चाहैत छी ? एहि पर लोकसभ कहलनि जे हमरासभकेँ अपन बच्चासभक लेल शिक्षाक आवश्यकता अछि।
