वरुण गांधीक टिकट कटल, अधीर रंजन चौधरी कांग्रेसमे सम्मलित होबए केर देलनि ऑफर

पीलीभीत
*

अधीर रंजन चौधरी भाजपा नेता वरुण गांधीक बारेमे पैघ बयान देलनि अछि। ओ कहलनि जे वरुण गाँधीक छवि स्वच्छ अछि, हुनका कांग्रेसमे आबय केर चाही।

जेना-जेना लोकसभा चुनाव लग आबि रहल अछि, राजनीतिक हलचल तेजीसँ बढ़ि रहल अछि। एम्हर अधीर रंजन चौधरीक एकटा पैघ बयान भाजपा नेता वरुण गांधीक बारेमे सामने आयल अछि। अधीर रंजन चौधरी कहलनि जे वरुण गाँधीक छवि साफ अछि आ हुनका कांग्रेसमे आबय केर चाही। ओ कहलनि जे जँ ओ कांग्रेसमे शामिल भऽ जयताह तखन हुनका खुशी होयत।

दरअसल एहि बेर आगामी लोकसभा चुनावमे भाजपा पीलीभीत सांसद वरुण गांधीकेँ टिकट काटि देलक अछि।

भारतीय जनता पार्टी (भाजपा) आगामी लोकसभा चुनावक लेल रविदिन १११ उम्मीदवारक सूची जारी कयलक। एहि सूचीमे वरुण गाँधीक पीलीभीतसँ टिकट काटि पूर्व केन्द्रीय मंत्री जितिन प्रसादकेँ नियुक्त कयल गेल अछि। ओना, पार्टी एक बेर फेर सुल्तानपुरसँ वरुणक माय मेनका गाँधीपर विश्वास व्यक्त कयलक अछि।

वरुण गाँधी पछिला किछु सालसँ पार्टीक विरुद्ध बयान दैत रहल छथि, जकर बाद हुनक टिकट कटबाक विचार कयल गेल छल। रविदिन भाजपाक सूचीमे टिकट कटयबाक अटकलपर सेहो मुहर लगा देल गेल।

वरुण गाँधीकेँ कहियो भाजपाक उभरैत सितारा मानल जाइत छल, आ लोक हुनकामे हुनक पिता संजय गाँधीक अक्स देखैत छल। २०१७ केर उत्तर प्रदेश विधानसभा चुनावमे भाजपाक शानदार जीतक बादो हुनक नाम सम्भावित सीएम केर रूपमे उछलल छल, मुदा योगी आदित्यनाथ सर्वश्रेष्ठ साबित भेलाह। एहिसँ पहिने २०१३ मे हुनका भाजपाक राष्ट्रीय महासचिव बनाओल गेल छल आ पश्चिम बङ्गालक प्रभार सेहो देल गेल छल, मुदा सङ्गठनक काजमे ओ कोनो विशेष रुचि नहिं देखौलनि। २०१४ मे हुनका सुल्तानपुरसँ लोकसभाक टिकट भेटल आ ओ सेहो जीति गेलाह, मुदा जल्दिये हुनक रुख पार्टीक विपरीत देखल जाए लागल।