आम आदमी पार्टीक विरोधकेँ देखैत दिल्ली पुलिस प्रधानमंत्री नरेन्द्र मोदीक निवासक बाहर सुरक्षा बढ़ा देलक अछि।
एकटा वरिष्ठ पुलिस अधिकारी कहलनि, “कानून आ व्यवस्था बनेने रखबाक लेल हम सुरक्षा कड़ा कऽ देने छी। एकर अतिरिक्त आम आदमी पार्टीक कार्यकर्ता सभकेँ सेहो विरोध करबाक अनुमति नहिं देल गेल अछि, जाहिसँ कानून-व्यवस्थाक स्थिति खराब नहिं होय।”
दिल्ली मेट्रो रेल कॉरपोरेशन कहलक “सुरक्षा कारणसँ लोक कल्याण मार्ग मेट्रो स्टेशन, पटेल चौक मेट्रो स्टेशनक गेट नंबर ३ आ सेंट्रल सेक्रेटरी मेट्रो स्टेशनक प्रवेश आ निकास द्वार अगिला आदेश धरि बंद रहत।”
पुलिस अधिकारी कहलनि, “आम आदमी पार्टीक विरोध केर देखैत पटेल चौक मेट्रो स्टेशन लग पैघ संख्यामे अर्धसैनिक बल तैनात कयल गेल अछि।”
यातायात पुलिस यात्रीसभकेँ कमल अतातुर्क मार्ग, सफदरजंग रोड, अकबर रोड आ तीन मूर्ति मार्गक मार्गसँ बचबाक सलाह सेहो देलक अछि। “जँ संभव होए तऽ यात्रीकेँ एहि मार्गक उपयोग नहिं करबाक चाही। एकर अतिरिक्त यदि संभव होए तऽ निजी वाहनक बदला सार्वजनिक वाहनक उपयोग करू।”
ओ कहलनि, “आईएसबीटी, रेलवे स्टेशन, इन्दिरा गाँधी हवाई अड्डा दिस जायवला यात्रीकेँ अपन यात्राक योजना बनेबाक चाही।”
अधिकारी आगू कहलनि, “आम जनता आ वाहन चालककेँ धैर्यपूर्वक यातायात नियमक पालन करबाक चाही।”
दिल्लीक मंत्री गोपाल राय द्वारा मुख्यमंत्री अरविन्द केजरीवालक गिरफ्तारीक विरोधमे प्रधानमंत्री नरेन्द्र मोदीक निवासक घेराव करबाक घोषणा कयलाक बाद सुरक्षा व्यवस्था कड़ा कयल गेल। हुनकर घोषणाक बाद दिल्ली पुलिस कोनो अप्रिय घटनासँ बचबाक लेल सुरक्षा कड़ा कऽ देलक अछि। अर्धसैनिक बल सेहो तैनात कयल गेल अछि।
एकर अतिरिक्त मंत्री राष्ट्रव्यापी विरोध प्रदर्शन करबाक घोषणा सेहो कयने छथि।
दिल्ली आबकारी नीति मामिलामे मुख्यमंत्री अरविंद केजरीवालकेँ २१ मार्चकेँ गिरफ्तार कयल गेल छल, तकर बाद हुनका दिल्ली हाईकोर्ट २८ मार्च तक पुलिस रिमांड पर भेज देने अछि।
