अनियंत्रित स्कार्पियो गाछसँ टकरायल, तीन गोटे खतम
बर्थडे पार्टीसँ आबि रहल छल सभगोटे
*
नवादा
*
बिहारक नवादा जिलामे बृहस्पति कऽ भोरमे एकटा स्कॉर्पियो सड़कक कातमे लागल गाछसँ टकरा गेल। एहि घटनामे जन्मदिनक पार्टीसँ घुरयवला तीनटा मित्रक मृत्यु भऽ गेल आ दू गोटे घायल भऽ गेलाह।
पुलिसक अनुसार ई घटना सिरदला-रजौली मार्ग पर धरमपुर मोड़ पर भेल।
प्राप्त जानकारीक अनुसार बुध कऽ किछु मित्र दोसर मित्रक जन्मदिनक पार्टीमे भाग लेबाक लेल देर राति रजौली गेल छलाह। सभ स्कार्पियोसँ जन्मदिनक पार्टीसँ घुरि रहल छल। एम्हर धरमपुर मोड़ लग चालकक वाहन पर नियंत्रण खतम भऽ गेल आ वाहन सड़कक कातमे एकटा गाछसँ टकरा गेल।
रजौली थानाक प्रभारी पवन कुमार बतौलनि जे एहि घटनामे तीनटा लोकक मौकापर मृत्यु भऽ गेल आ दू गोटे घायल भऽ गेलाह।
मृतकक पहिचान नरहट थाना क्षेत्रक खनवां गामक निवासी विवेक कुमार (२६), रोशन कुमार (२७) आ नरौली गामक चन्दन कुमार (२७) केर रूपमे भेल अछि।
ओ कहलनि कि घायल सभकेँ स्थानीय अस्पतालमे भर्ती कराएल गेल अछि। पुलिस शव केर अपना अधीन लय पोस्टमार्टमक लेल अस्पताल भेजि देलक अछि आ मामिलाक छानबीन कय रहल अछि।
