राम मंदिरक उद्घाटनमे लाल कृष्ण आडवाणी, मुरली मनोहर जोशी समेत कतेकोकेँ भेटल आमंत्रण

तहिना सोनिया गांधी, मनमोहन सिंह समेत विपक्षक प्रायः सभ प्रमुख आमंत्रित

*

अयोध्या

*

२२ जनवरीकेँ उत्तर प्रदेशक अयोध्यामे बनाओल जा रहल राम मन्दिरक उद्घाटन होमय जा रहल अछि। एहि कार्यक्रममे शामिल होयबाक लेल गणमान्य सभ आमंत्रित कयल जा रहल छथि। विश्व हिन्दू परिषद (विहिप)क कार्यकारी अध्यक्ष अशोक कुमारक अनुसार, श्रीराम जन्मभूमि तीर्थ क्षेत्र लाल कृष्ण आडवाणी आ मुरली मनोहर जोशीकेँ आमंत्रित कयलक अछि। तहिना विपक्षक कांग्रेसक वरिष्ठ नेता सोनिया गाँधी, मनमोहन सिंह, मल्लिकार्जुन खड़गे, अधीर रंजन चौधरी आ जद(एस) प्रमुख देवगौड़ाकेँ अगिला मास होबयवला राम मन्दिरक उद्घाटन समारोहक लेल निमंत्रण पठौलक अछि।

राम मन्दिरक आयोजनमे राजनीतिक दलक प्रमुखसभकेँ सेहो आमंत्रित कयल जयबाक सम्भावना अछि। एहिमे आम आदमी पार्टी (आप) नेता अरविंद केजरीवाल, बसपा नेता मायावती, सीपीएम नेता सीताराम येचुरी आ भाकपाक डी राजा शामिल छथि।

विश्व हिन्दू परिषद कहलक जे लालकृष्ण आडवाणी आ मुरली मनोहर जोशीकेँ समारोहमे भाग लेबाक लेल हरसंभव प्रयास करत। १९९०क दशकमे दुनू राम मन्दिर आन्दोलनमे सबसँ आगू छलाह। किछु दिन पहिने मंदिर ट्रस्ट कहलक जे आडवाणी आ जोशीकेँ स्वास्थ्य आ आयुक कारणेँ समारोहमे शामिल नहिं होयबाक अनुरोध कयल गेल छल। मन्दिर न्यास सन्त, वैज्ञानिक, सेना अधिकारी, पद्म पुरस्कार विजेता, उद्योगपति, दलाई लामा आ विभिन्न क्षेत्रक अन्य प्रतिष्ठित व्यक्तित्वसभकेँ सेहो आमंत्रित कयलक अछि।

राम मंदिर निर्माणक काज तेजीसँ चलि रहल अछि। एकर पहिल चरण १५ जनवरी धरि पूरा होयबाक आशा अछि। प्राण प्रतिष्ठा पूजा १६ जनवरीसँ प्रारम्भ होयत। राम मन्दिरक उद्घाटन २२ जनवरीकेँ होयत। प्रधानमंत्री नरेन्द्र मोदी आ उत्तर प्रदेशक मुख्यमंत्री योगी आदित्यनाथ एहि कार्यक्रममे भाग लेताह।

१७ जनवरीकेँ भगवान रामक १०० मूर्तिक सङ्ग भगवान रामक जीवनक दृश्यकेँ चित्रित करयवला झांकीक जुलूस निकालल जायत। जुलूसमे भगवान रामक जन्मसँ वनवास, लंका पर विजय आ अयोध्या वापसीक चित्रण करयवला मूर्ति आ चित्र होयत। ई जुलूस प्राण प्रतिष्ठा समारोहक लेल सप्ताह भरि चलयवाला उत्सवक औपचारिक आरम्भक प्रतीक होयत।