सुपौलमे भीषण बस-पिकअप टक्करमे एक दर्जनसँ बेसी घायल, टोल सुपरवाइजरक मृत्य

सुपौल समदिया
*

सुपौलमे भयंकर सड़क दुर्घटना भेल । शुक्रदिन लगभग १:३० बजे यात्रीसँ भरल बस आ पिकअप वैनक बीच भयंकर टक्कर भेल। टक्कर एतेक तेज छल जे वाहन उड़ि गेल। एहि दुर्घटनामे एकटा व्यक्तिक दुखद मृत्यु भऽ गेल। जखन कि एक दर्जनसँ बेसी लोक घायल भेल अछि। घायलमेसँ चारि गोटेकेँ एनएचएआई एम्बुलेंससँ अनुमंडलीय अस्पताल निर्मली लऽ जायल गेल। प्राथमिक चिकित्साक बाद तीन लोककेँ नीक इलाजक लेल हायर सेंटर रेफर कयल गेल अछि। कहल जा रहल अछि जे आन घायल सभक इलाज सुपौल जिलाक विभिन्न अस्पतालमे चलि रहल अछि। ई दुर्घटना किशनपुर थाना क्षेत्रक राष्ट्रीय राजमार्ग ५७ पर निर्मलीसँ सटल कोसी टोल प्लाजाक लग भेल। कोसी टोल प्लाजाक प्रबंधक बी भी पाण्डेय बतौलनि जे भयावह सड़क दुर्घटनामे टोल प्लाजाक सुपरवाइजर योगेन्द्र तिवारीक मौकापर मृत्यु भऽ गेल। योगेन्द्र उत्तर प्रदेशक बलरामपुर जिलाक खलवा शहरक निवासी छलाह। निर्मली एसडीएचमे ड्यूटी पर तैनात डॉक्टर कहलनि कि सड़क दुर्घटनामे एकटा मृत व्यक्ति आ कतेको घायल केर अस्पताल आनल गेल अछि। जिनकर इलाज भए रहल अछि। घायलक पहिचान सुपौल जिलाक किशनपुर थाना क्षेत्रक चौहट्टा गामक निवासी चन्दन कुमार, सोनू कुमार, मनोज कामत आ अरुण कुमारक रुपमे भेल अछि। दुर्घटनाक सूचना भेटलाक बाद किशनपुर आ निर्मली थानाक पुलिस जाँच आ आगूक कार्रवाई शुरू कऽ देलक अछि। बस आ पिकअप वैनक एहि जबरदस्त टकरावसँ एकटा ऑटो सेहो टकरा गेल आ क्षतिग्रस्त भऽ गेल। घटनाक बाद दिन भरि घटनास्थल पर भीड़ जमा भेल , एम्हर एनएचएआई क्रेनक सहायतासँ क्षतिग्रस्त वाहनसभकेँ चारि लेनसँ हटा देल गेल। घटनाक कारण एखन धरि पता नहि चलल अछि। मुदा एहि दुर्घटनामे घायल लोकक कहब छनि जे ई दुर्घटना बसक ब्रेक फेल भेलाक कारण भेल छल।