मंगलदिन ‘वक्फ (संशोधन) विधेयक-२०२४’ पर जेपीसीक बैसारमे चर्चाक क्रममे तृणमूल कांग्रेसक सांसद कल्याण बनर्जी हंगामाक बीच काँचक बोतल तोड़ि देलनि।
टीएमसी सांसद कल्याण बनर्जीकेँ हुनकर व्यवहारक लेल जेपीसीक बैसारसँ एक सत्रक लेल निलम्बित कऽ देल गेल। माने ओ जेपीसीक अगिला बैसारमे भाग नहि लऽ सकैत छथि। ई निर्णय जेपीसीक बैसारमे ९-७ मतक अन्तरसँ लेल गेल अछि।
सूत्रक अनुसार, जेपीसीक बैसारक दौरान जखन जस्टिस इन रियल्टी, कटक आ पंचसखा बानी प्रचार मंडली, कटकक प्रतिनिधि बजि रहल छलाह तखन बैसारमे जोरदार हंगामा भेल।
वास्तव मे टीएमसी सांसद कल्याण बनर्जी कतेको बेर बिना बारी केर बात कय चुकल छलथि। मुदा जखन ओ फेरसँ बजबाक प्रयास कयलनि तखन भाजपा सांसद अभिजीत गंगोपाध्याय एहि पर आपत्ति जतौलनि। एहि पर दुनूक बीच तीक्ष्ण आ जोरदार बहस भेल।
सूत्रक अनुसार, बहसक दौरान कल्याण बनर्जी मेज पर राखल कांचक पानिक बोतल केर मेज पर पटकि तोड़ि देलनि। एहिसँ कल्याण बनर्जीकेँ चोट सेहो लागल। तखन ओ बोतलक टूटल भागकेँ अध्यक्ष दिसि उछालि देलनि।
एहि घटनाक बाद जेपीसीक बैसार तत्काल स्थगित कऽ देल गेल। सत्तारूढ़ दल आ विपक्षी दुनू सांसद सेहो एक-दोसरा पर एहि घटना पर अपमानजनक भाषाक प्रयोग करबाक आरोप लगा रहल छथि।
मुदा, किछु समयक बाद जेपीसीक बैसार फेरसँ शुरू भऽ गेल।
