टीएमसी सांसद डेरेक ओ’ब्रायन दुर्व्यवहारक कारण राज्यसभासँ निलंबित
नई दिल्ली
*
तृणमूल कांग्रेसक सांसद डेरिक’ओ ब्रायनकेँ संसदक शीतकालीन सत्रसँ निलम्बित कऽ देल गेल अछि। राज्यसभाक सभापतिक कहब अछि जे डेरिक सदनक कार्यवाही बाधित कयलनि अछि। एकर बाद हंगामा बढ़ि गेल। ‘तानाशाही नहिं चलत’क नारा लगाओल गेल आ राज्यसभाक कार्यवाही २ बजे धरि स्थगित कऽ देल गेल।
राज्यसभा सांसद डेरिकओ’ब्रायन आ कतेको अन्य विपक्षी सांसद बृहस्पतिकेँ संसदक सुरक्षा पर चर्चाक माँग कऽ रहल छलाह। अट्ठाईस विपक्षी सदस्य संसदमे सुरक्षा सम्बन्धी मुद्दा पर चर्चाक लेल नोटिस देने छलाह, मुदा सभापति नियमक हवाला दैत एकर अनुमति नहिं देलनि।
एकर बाद विपक्षी सांसद सभापतिक आसनक ठीक सामने वेल पर आबि नाराबाजी शुरू कऽ देलखिन। सभापति नाराबाजी करय बला सांसदसभकेँ अपन सीट पर वापस जयबाक लेल कहलनि। मुदा अपन विरोध व्यक्त कयनिहार सांसद एहि पर सहमत नहिं भेलाह। कांग्रेस, तृणमूल कांग्रेस, राजद, जेडीयू, आप सहित कतेको विपक्षी दलक सांसद सुरक्षाक मुद्दा पर चर्चा करबाक लेल नाराबाजी करैत रहलाह।
आसनक ठीक सामने नारा लगा रहल तृणमूल कांग्रेसक सांसद डेरिकओ’ब्रायनकेँ सभापति तत्काल सदन छोड़य केर आदेश देलखिन । सभापतिक कहब छल जे डेरिककेँ सदन छोड़बाक आदेश देलाक बादो ओ सदनमे उपस्थित रहलाह आ कार्यवाहीमे लगातार बाधा उत्पन्न कऽ रहल छलाह।
सभापति नियम २५६क अन्तर्गत डेरिक ओ’ब्रायन पर कार्रवाई कयलनि।
एम्हर राज्यसभामे सदनक नेता आ केन्द्रीय मंत्री पीयूष गोयल सेहो डेरिकक विरुद्ध नियम २५६क अन्तर्गत कार्रवाई करबाक प्रस्ताव रखलनि। तखन डेरिककेँ शीतकालीन सत्रक शेष भागसँ बाहर कऽ देल गेल।
डेरिकक निलम्बनक बाद सदनमे हंगामा आओर बढ़ि गेल। विपक्षी सदस्य लोकनि “तानाशाही नहिं चलत, नहिं चलत” आ “संसदक सुरक्षापर चर्चा करु” नारा लगओलनि। हंगामा बढ़ला पर सभापति सदनक कार्यवाही २ बजे तक स्थगित कऽ देलखिन।
१३ दिसंबरकेँ दू गोटे लोकसभामे प्रवेश कयलाक बाद ई मुद्दा उठल। बुधदिन लोकसभामे दूटा युवक दर्शक दीर्घासँ कूदि सदनमे प्रवेश कयलक। ई युवा लोकसभामे सांसदक बीच रंगीन पटाखासँ धुआँ पसारि देने छल। एहिसँ सदनमे पीयर धुआं भऽ गेल
