भारत-नेपाल सीमावर्ती क्षेत्रक नामी गिरामी वीर शिवाजी टी ट्वेंटी क्रिकेट कप टूर्नामेंट २२ दिसंबरसँ आरंभ

मधुबनी समदिया

*

पहिल दिनक उद्घटान मैच बनारस (उत्तर – प्रदेश) आ रौतहट (नेपाल) टीमक बीच राम निरंजन जनता स्नातक महाविद्यालय रामपुर, मधवापुरक विशाल मैदान पर होयत।

नेपाल, उत्तर प्रदेश, झारखंडक दू-दूटा, महाराष्ट्रक एकटा, शेष बिहारक टीम सभ भऽ रहल अछि शामिल। आयोजन के ल’ आयोजन समिति कयलक प्रेस वार्ता, देलक जनतब।

जिलाक मधवापुर प्रखंड मुख्यालय अवस्थित रामनिरंजन जनता स्नातक महाविद्यालयक रामपुर मधवापुरक विशाल प्रांगणमे 22 दिसंबरसँ भारत -नेपाल सीमावर्ती क्षेत्रक नामी गिरामी “वीर शिवाजी टी ट्वेंटी क्रिकेट कप टूर्नामेंट 2023 -24” केर आरंभ होयत। एहि कार्य्रकमक सफलता आर विस्तारसँ आम जनता आर खेल प्रेमीकेँ जनतब देबाक लेल वृहस्पति दिन महा विद्यालयक प्रांगणमे आयोजन समिति द्वारा प्रेस वार्ताक आयोजन कयल गेल। जाहिमे एहि बरखक टूर्नामेंटक आयोजनक ल’ विभिन्न तरहक सूचना प्रेसक माध्यमसँ सार्वजनिक कयल गेल। ई जनतब दैत समितिक प्रतिनिधि सभ कहलैन्ह जे वर्ष 2017 मे स्थापनाक बादसँ भारत-नेपाल सीमावर्ती क्षेत्रक एहि प्रसिद्ध क्रिकेट टूर्नामेंटमे दुनू देशक टीम जितबाक लेल खेलैत रहला। एहि बेर अहि आयोजनमे भारत केर मुंबई, प्रयागराज, बनारस, रांची, हरिने, पटना, जयनगर, नानपुर, पलामू, शेखपुरा, मधवापुर, पुपरी, राज इलेवन मुरलिया आर झंझारपुरक टीम खेलत।

ओहिठाम पड़ोसी मित्र राष्ट्र नेपालक रौतहट आर लादोबेला गामक टीम सङ्ग कुल 16 टीम खेलत।

ई अछि टूर्नामेंटक मैच शेड्यूल :

जनतब दी 22 सँ 30 दिसंबर 2023 धरि लीग मैच, 2 जनवरीसँ 5 जनवरी 2024 धरि क्वार्टर फाइनल, 8 आ 9 जनवरी 2024 कय सेमी फाइनल, 12 जनवरी कय तेसर स्थानक मुकाबला होयत। जखनि कि 16 जनवरी 2024 कय फाइनल महामुकाबला खेलल जाएत। एहि आयोजनक सफलताक ल’ पिच निर्माण, मैदानक समतलीकरण, टीम प्रबंधन सङ्ग सभ तरहक तैयारी अंतिम चरणमे अछि। जनतब दी जे एहि बेर मैदानमे पहुंचय वला हजारों खेलप्रेमी दर्शक सबहक पीबाक लेल समिति दिससँ पेयजलक व्यवस्था सेहो कयल जाएत। टूर्नामेंटक उद्घाटन स्थानीयसँ बिहार विधान सभा, विधान परिषदक जनप्रतिनिधि आ जिला अनुमंडलक वरीय अधिकारी सबहक गरिमामय उपस्थितिमे कयल जाएत। एहि बेर संपूर्ण खेलक आयोजनक लाइव प्रसारण मीडिया पार्टनर “मीडिया लाइव न्यूज” पर देखाओल जाएत। आयोजनक देखरेख आ मार्गदर्शन लेल स्थानीय बुजुर्ग क्रिकेट प्रेमी अभिभावक सबहक एकटा मार्गदर्शक कमिटी सेहो गठित कयल गेला।

एहि प्रेस वार्ताक अध्यक्षता रामनिरंजन जनता स्नातक महाविद्यालयक प्राचार्य प्रो. जयमंत मिश्र केलैन्ह। एहि अवसर पर कार्यकारिणी अध्यक्ष बद्रीनारायण साह, उपाध्यक्ष पीतांबर मिश्र, सचिव राजेश कुमार साह, उप सचिव अतिबूल रहमान, संयोजक अमरेंद्र मिश्र बबलू, व्यवस्थापक मुन्ना कुमार साह, नंदकिशोर साह, कमलेश पूर्वे, अजय भंडारी, मोती साह, रजवन साह, उमेश साह, संरक्षक चेतन कुमार रश्मि, शिव कुमार साह, गणेश साह, रवि शंकर साह, रमन झा, मो मोस्तकीम, सदस्य विकास साफी, दीपेश साफी, रामबाबू मंडल, संजय साह, संजीत कुमार साह, उमेश साह, राजकिशोर कुमार, प्रवीण कुमार, शिवराज कुमार, दीपेश कुमार, संजीत कुमार साह, जेके साह सङ्ग आयोजन समितिक सभ सदस्य उपस्थित छलैथ।