सूचना आ प्रसारण मंत्री अनुराग ठाकुर सोमदिन पश्चिम बंगालमे ममता बनर्जीक नेतृत्ववला सरकारक आलोचना कयलनि जखनि पुलिस सन्देशखलीमे हिंसाक “रिपोर्टिंग” कऽ रहल एकटा टेलीविजन पत्रकारकेँ पकड़लक। अनुराग ठाकुर कहलनि, “महिला सभक संग दुर्व्यवहार करयवाला गुंडा सभक विरुद्ध कार्रवाई करय केर बदला पश्चिम बंगाल सरकार मीडियापर अंकुश लगा रहल अछि आ प्रेसक स्वतन्त्रताकेँ खत्म करबाक प्रयास कऽ रहल अछि। ई बहुत दुर्भाग्यपूर्ण अछि।”
रिपब्लिक बांग्ला टेलीविजन चैनलक एकटा रिपोर्टरकेँ बंगाल पुलिस ओहि समय पकड़लक जखन ओ सन्देशखलीक घटनाक्रमक रिपोर्टिंग कऽ रहल छल। ठाकुर कहलनि जे महिला मुख्यमंत्रीक शासन वला राज्य सन्देशखलीमे महिलासभक दुर्दशा पर आँखि मूँद रहल अछि। उत्तर २४ परगना जिलाक सन्देशखलीमे एहि क्षेत्रमे तनाव पसरि गेल, किएक तँ पैघ संख्यामे महिलासभ द्वारा टीएमसी नेता शाहजहाँ शेख आ हुनक समर्थकपर जमीन हड़पबाक आ यौन उत्पीड़नक आरोप लगाओल गेल अछि।
एम्हर बंगालक राज्यपाल सी वी आनन्द बोस राजनीतिक दल आ विभिन्न पृष्ठभूमिक लोकसभसँ अपील कयलनि जे ओ एक सङ्ग आबि पीड़ित महिलासभक सङ्ग एकजुटता व्यक्त करबाक लेल सन्देशखलीमे ‘शान्ति यात्रा’ निकालथि। ओ कहलनि, “हम कानूनक पालन करयवाला नागरिक सभ, नागरिक संस्थाक नेता सभ आ सभ राजनीतिक दलसँ अपील करैत छी जे ओ सभ संदेशखालीमे शांति यात्रामे एकजुट होइथ, ओतय केर ओहि सड़क पर जाइथ जतय अविश्वास, संदेह आ अराजकता देखल जा रहल अछि आ हुनका सभक संग ठाढ़ होइथ।”
राजभवनसँ जारी सन्देशमे बोस कहलनि, “हम सन्देशखलीक अपन पीड़ित बहिनसभकेँ आश्वासन दैत छी जे हम सभ अहाँक सङ्ग छी। अहां के डरए केर जरूरत नहिं अछि। समाजमे अहाँक उचित स्थान सुरक्षित रहत।”
एम्हर राष्ट्रीय महिला आयोग (एनसीडब्ल्यू)क अध्यक्ष रेखा शर्मा संदेशखलीसँ वापिस अयलाक बाद बोससँ भेंट कयलनि आ कहलनि जे ओ पुलिस महानिदेशक राजीव कुमारसँ सेहो भेंट करतीह।
