बिहारक पूर्व उपमुख्यमंत्री आ राजद नेता तेजस्वी यादव मंगल दिन पटनासँ अपन ‘जन विश्वास यात्रा’ शुरू कयलथि। तेजस्वी यादव माय राबड़ी देवी आ पिता लालू यादवक आशीर्वादसँ जन विश्वास यात्राक शुरुआत कयलनि। एहि अवसर पर तेजस्वी यादव कहलनि जे जनता हमर मालिक अछि। हम ओकर बीच जा रहल छी। जन विश्वास यात्रा आइसँ शुरू भऽ रहल अछि। जे काज हम १७ महीनामे केलहुं ओकरा जनताक सामने राखल जाएत। नीतीश कुमार लग गठबंधन बदलबाक नहिं कोनो कारण छलनि आ नहिं हुनका लग कोनो विजन अछि। नीतीश कुमार जनमतक महत्व नहिं दैत छथि, लोक हुनका जवाब देत।
नीतीश कुमारक आलोचना करैत तेजस्वी यादव कहलनि जे पिछला दू चुनावसँ जनता अपन प्रेम आ समर्थन दऽ कए राजदकेँ सबसँ पैघ पार्टी बना देलक अछि। आशा अछि जे जनता आबयवला समयमे राजद केर समर्थन करैत रहत।
एहि अवसर पर तेजस्वीक पिता आ बिहारक पूर्व मुख्यमंत्री लालू यादव कहलखिन कि हमर पूरा आशीर्वाद अछि। बहुत काज भेल अछि। आगू आउर काज करत। जनतासँ एकर मनोबल बढ़यबाक अपील अछि। ओतहि पुर्व मुख्यमंत्री माय राबड़ी देवी कहलनि जे पिछला बेर सेहो ओ (नीतीश कुमार) पलटि गेल छलाह, पुनः ओ स्वयं आबि गेलाह, हम नहिं बजेलौंह। जाँच होबय दियौक, हमरासभक उपर २५ सालसँ जाँच चलि रहल अछि मुदा किछु नव कहाँ निकलि कऽ आबि रहल अछि ? हमरा संग देश आ बिहारक जनता अछि।
तेजस्वी सभ जिलामे जएताह
तेजस्वी यादवक ‘जन विश्वास यात्रा’ ११ दिनक भीतर राज्यक सभ ३८ जिलाकेँ कवर करत। रातिमे रुकबाक लेल मोतिहारी पहुँचबासँ पहिने ओ सीतामढ़ी आ शिवहरमे दूटा रैलीकेँ सेहो सम्बोधित करताह। तेजस्वी यादव सोमदिन देर साँझ फेसबुक पर लाइव अयलथि आ मुख्यमंत्री नीतीश कुमारकेँ पुरना जमानाक नेता कहलनि, संगहि इहो कहलनि जे नीतीश कुमार अपन कुर्सी स्वयं छोड़ि देथि तऽ निक रहत।
