जम्मू-कश्मीरक कठुआ जिलाक मचेडी क्षेत्रमे सोमदिन आतंकवादी द्वारा भारतीय सेनाक काफिला पर हमलासँ ४ सैनिक शहीद भ गेल आ ६ घायल भऽ गेलाह। इ जगह भारतीय सेनाक दस्ता ०९ के अधिकार क्षेत्रमे अछि।
रक्षा अधिकारीसभक अनुसार, जम्मू-कश्मीरक कठुआ जिलाक मचेडी क्षेत्रमे आतंकवादी द्वारा भारतीय सेनाक काफिलापर हैंड ग्रेनेडसँ हमला कयल गेल। ई क्षेत्र भारतीय सेनाक ९ कोरक अन्तर्गत अबैत अछि।
आतंकवादी हमलाक बाद भारतीय सेना जबाबी कार्यवाही करैत फायरिंग शुरू कयलक आ व्यापक पैमाना पर तलाशी अभियान शुरू कयलक, मुदा आशंका अछि जे आतंकवादी फरार भऽ गेल। समाचार सम्प्रेषण तक मुठभेड़ चलि रहल छल।
रक्षा अधिकारी लोकनि कहलनि, आतंकवादीक गोलीबारीक बाद हमर सैनिक सेहो जवाबी कार्यवाही कयलक। जम्मू-कश्मीरमे पाछुक किछु माससँ आतंकवादी हमलाक संख्यामे वृद्धि देखल गेल अछि। राजौरी जिलाक माजाकोट क्षेत्रमे ७ जुलाईकेँ सेनाक एकटा जवान घायल भेलाक बाद आतंकवादीसभकेँ पकड़बाक लेल व्यापक तलाशी अभियान पहिनेसँ चलि रहल छल।
