स्थानीय विधायक सह पूर्व मंत्री डॉ. आलोक रंजन मंगलदिन बिहार विधानसभाक एगारहम सत्रमे जनहितक बहुत रास मुद्दा उठबैत तत्काल निवारणक मांग कयलनि। एहि केर तहत चैनपुर, बनगांव, पड़री आ बसौना गाममे बानरक खतरासँ पीड़ित किसान सभक समस्या उठौलनि। एहि मुद्दा केर उठबैत सरकारसँ आग्रह कयलथि जे एकर सही समाधानक लेल ठोस पहल कयल जाए। ओ अपन प्रश्नमे कहलनि जे उक्त गामक किसान सभकेँ बानरक खतराक कारण कतेको एकड़ फसल नुकसान भऽ रहल अछि। आब तऽ एहि इलाकामे बानर घरमे प्रवेश कय लोककेँ नुकसान पहुंचाबैत अछि। आम लोक एहिसँ बहुत परेशान छथि।हुनका भारी नुकसानक सामना करय पड़ैत छनि। कतेको ठाम विभाग केर बानरक लोक पर हमला करय केर जानकारी सेहो देल गेल अछि। सरकार डॉ. आलोक रंजनक सवाल केर स्वीकार कयलक आ एहि सवालक जवाबमे विभागीय मंत्री आश्वासन देलथि जे सरकार एहि विषय पर ठोस कार्रवाई करत। ओतहि पर्यावरण, वन आ जलवायु परिवर्तन विभागक मंत्री डॉ. प्रेम कुमार जवाब दैत कहलनि जे जिला क्षेत्रीय कार्यालयक बंनगांव, पड़री चैनपुर आ बसौना सहित अन्यान्य गाममे बानर द्वारा फसल केर बीच-बीचमे आंशिक नुकसानक जानकारी भेटल अछि। बानर आ अन्य वन जानवरक खतरा पर नियंत्रणक लेल संभागीय स्तर पर बचाव दलक गठन कयल गेल अछि।बानर द्वारा उपज आ फसलक नुकसानक संबंधमे जानकारी मिलला पर नियमक अनुसार आवश्यक कार्रवाई कयल जा रहल अछि। जाहिसँ बेलगाम बानरकेँ पकड़ि कय दूरस्थ जगह पर छोड़ि नियंत्रण कयल जा सकैत अछि।
