प्रधानमंत्री नरेन्द्र मोदी सोमदिन तेलंगानाक जगतियालमे एकटा रैलीमे राहुल गाँधीपर निशाना साधैत कहलनि जे हुनकर लड़ाई शक्तिक विरुद्ध अछि आ हमरा लेल प्रत्येक माय आ बेटी शक्तिक प्रतीक अछि। आगू ओ कहलनि “हम भारत माताक पुजारी छी, हम शक्तिक हर रूपक रक्षाक लेल अपन जीवन खपा देब।”
एहिसँ पहिने पीएम मोदी कहलनि, “काल्हि मुम्बईमे इंडी एलायंसक रैली छल। चुनावक घोषणाक बाद इंडी एलायंसक ई पहिल आ सबसँ महत्वपूर्ण रैली छल। ओहि रैलीमे ओ अपन घोषणापत्र जारी कयलनि आ हुनक घोषणापत्रमे घोषणा कयल गेल अछि जे हमर (इंडी एलायंस) लड़ाई शक्तिक विरुद्ध अछि।”
पीएम मोदी कहलनि, “इंडी गठबंधन कहलक अछि जे हुनकर लड़ाई शक्तिक खिलाफ अछि। हमरा लेल हर माय, बेटी शक्तिक रूप अछि। हम माता-बहिनकेँ शक्तिक रूप मानैत छी। हम ओकर पूजा करैत छी। हम माय-बहिनक रक्षाक लेल अपन प्राणक बलिदान करब। भारतक धरती पर कियो शक्तिक खिलाफ बात कए सकैत अछि की ? की शक्तिक विनाश हमरा स्वीकार्य अछि ? हम सभ शक्तिक पूजा करैत छी। हम चन्द्रयानक सफलताक नाम सेहो शिव-शक्ति राखि शिव-शक्तिकेँ समर्पित कयने छी। ई लोक शक्तिक विनाशक बिगुल बजा रहल अछि।”
प्रधानमंत्री मोदी आगू कहलनि, “एक दिस शक्तिक विनाशक बात करनिहार छथि, दोसर दिस शक्तिक पूजा कयनिहार छथि। मुकाबला ४ जूनकेँ भऽ जायत कि, के शक्तिक विनाश कऽ सकैत अछि आ के शक्तिक आशीर्वाद प्राप्त कऽ सकैत अछि।”
ओ कहलनि “लोकसभा चुनावक घोषणा भऽ गेल अछि। दुनियाक सबसँ पैघ लोकतंत्रक उत्सव शुरू भऽ गेल अछि आ १३ मईकेँ तेलंगानाक जनता एकटा नव इतिहास रचय जा रहल अछि। तेलंगानामे १३ मईकेँ मतदान ‘विकसित भारत’क लेल होयत आ जखन भारतक विकास होयत तखन तेलंगानाक विकास सेहो होयत।”
दरअसल रविदिन भारत जोड़ो न्याय यात्राक समापन पर मुम्बईमे एकटा रैलीकेँ सम्बोधित करैत कांग्रेस नेता राहुल गाँधी कहने छलाह जे हिन्दू धर्ममे ‘शक्ति’ नामक एकटा शब्द अछि। आ हम एकटा शक्तिक खिलाफ लड़ि रहल छी।
