शिवसेना उद्धव ठाकरे गुटक नेता विनोद घोषालकरक बेटा अभिषेक घोषालकरकेँ गोली मारि हत्या कऽ देल गेल अछि। अभिषेककेँ फेसबुक लाइवक दौरान गोली मारल गेल। हमलावर सबसँ पहिने अभिषेकसँ फेसबुक लाइव पर बात केलक। तखन ओ उठल आ अभिषेककेँ कतेको गोली मारि देलक। एकर बाद हत्यारा अपनाकेँ सेहो गोली मारि लेलक, जाहिसँ ओकर मृत्यु भऽ गेल।
गोलीबारीक घटना मुंबईक दहिसर क्षेत्रक एमएचबी कॉलोनी थाना क्षेत्रमे भेल। विनोद घोषालकर शिवसेनाक उद्धव ठाकरे गुटक पूर्व पार्षद छथि। अभिषेक पर मौरिस नोरोन्हा हमला कयलख, जे मौरिस भाईक नामसँ जानल जाइत छल।
हमलावर मौरिस आ अभिषेकक बीच पहिनेसँ विवाद छल। हालमे दुनूक बीच समझौता भेल छल। अभिषेककेँ मौरिस एकटा कार्यक्रमक लेल अपन कार्यालयमे बजौलक। प्रोग्राम वेबकास्ट कएल जाए रहल छल। मौरिस अभिषेककेँ किएक गोली मारलक से एखन धरि स्पष्ट नहिं भेल अछि।
एहि घटना पर उद्धव ठाकरेक बेटा आदित्य ठाकरे कहलनि, “अभिषेक घोषालकर पर गोली चलाओल गेल अछि से हमरा पता चलल अछि। कतेक दिन धरि हमर एकरा सहन करी ? एहि तरहक घटनासँ मात्र महाराष्ट्रक बदनामीए टा नहिं भऽ रहल अछि, बल्कि एहिठामक लोक भयभीत सेहो भऽ रहल अछि। जँ ई स्थिति बनल रहत तँ सबसँ महत्वपूर्ण बात ई अछि जे महाराष्ट्रमे उद्योग नहिं आओत।”
किछु दिन पहिने भाजपा विधायक पुलिस स्टेशनमे शिवसेनाक एकनाथ शिंदे गुटक नेता महेश गायकवाड पर गोली चला देने छलाह। आब शिवसेना नेताक बेटाक हत्या कैमराक सोझाँ कय देल गेल।
