बिहारमे भयंकर गर्मी, तापमान होयत 40° पार

पटना । समदिया

मौसम विभाग द्वारा 2 जूनसँ एक सप्ताह धरि पूरा राज्यमे कोनो जिलाके लेल बरखाक चेतावनी नहि देल गेल अछि आओर संकेतसँ पता चलैत अछि जे बेसि जिलाक तापमान 40 डिग्री सेल्सियससँ ऊपर रहत। किछु इलाकामे सोमदिन यानी आइ बरखा भ सकैत अछि। पिछला दू-तीन दिन पाहिले पूरा बिहारमे तापमानमे गिरावट आयल छल। पिछला तीन दिनसँ तापमान 40 डिग्री सेल्सियसक निशानसँ नीचा दर्ज कयल गेल अछि। पिछला बृहस्पतिकेँ राज्यभरिमे आंधी-तूफान आ भारी बरखासँ तबाही मचल छल, जाहिसँ तापमानमे काफी गिरावट आयल। ओना आब लोककेँ एक बेर फेरसँ तपल गर्मी सहबा लेल अपना कय तैयार करबाक अछि।

एहि बदलावक संकेत शनिदिनसँ देखबामे आबय लागल। मौसम केर पूर्वानुमान केर अनुसार किछु जिलामे काल्हि रविदिन (31 मई) आ आइ सोमदिन (1 जून) केँ बहुत हल्का बारिशक संभावना बनल अछि। मुदा धीरे-धीरे गर्मी तेज हेबाक उम्मीद अछि। 2 जूनसँ राज्यभरि केर कोनो भी जिला लेल बारिशक चेतावनी लागू नहि अछि आ अधिकांश जिलामे तापमान 40 डिग्री सेल्सियससँ बेसी होयबाक अनुमान अछि।

मौसम विभाग द्वारा जारी सलाहक अनुसार काल्हि पूरा बिहारक किछु जिलामे अलग-थलग इलाकामे तेज हवा, बिजली आ गरज केर संग हल्का बरखाक संभावना अछि। बेसी वर्षाक संभावना पश्चिम चंपारण, पूर्वी चंपारण, सिवान, सारण आ गोपालगंजमे सबसँ बेसी अछि। एम्हर बक्सर, रोहतास, कैमूर, औरंगाबाद, अरवल आ भोजपुर जँका जिलाक संग-संग गया, जहानाबाद आ पटना केर मध्य जिलाक किछु हिस्सामे पूर्वानुमानक अनुसार आंशिक रूपसँ बादल छाएत, जाहिमे किछु स्थान पर हल्का बूंदाबांदी केर संभावना अछि।