वरिष्ठ इतिहासकार डॉ. अवनीन्द्र कुमार झा भारत सरकारक संस्कृति मंत्रालय द्वारा सिनियर फेलोशिप हेतु चयनित

मिथिलाक्षर साक्षरता अभियानी डाॅ अवनीन्द्र कुमार झाकेँ मिथिलाक्षर साक्षरता अभियान दिशिसँ एहि महान उपलब्धि हेतु अभिनंदन
पटना समदिया!! मैथिली भाषाक प्राचीन इतिहास पर अनुसंधान करबाक लेल मिथिला भारती शोध पत्रिका केर संपादक मंडलक वरिष्ठ सदस्य एवं वरिष्ठ इतिहासकार डॉ. अवनीन्द्र कुमार झाकें वर्ष 2025-26 हेतु भारत सरकारक संस्कृति मंत्रालय द्वारा सिनियर फेलोशिप प्रदान करबाक लेल चयनित कएल गेल छन्हि। डॉ. झाक शोधक विषय “आद्य मैथिली साहित्य चर्यापद : विश्लेषणात्मक अध्ययन” होयत। वरिष्ठ इतिहासकार प्रो. रत्नेश्वर मिश्रक शिष्य डॉ. अवनीन्द्र झा मिथिलाक आधुनिक इतिहास पर विगत अनेक दशक सs अनुसंधान कएलन्हि अछि। हिनक दर्जनों शोधालेख अंतरराष्ट्रीय एवं राष्ट्रीय शोध-पत्रिका सभमे प्रस्तुत कएल जा चुकल अछि। अनेक शोध ग्रंथक लेखक डॉ. झा कें भारतीय इतिहास अनुसंधान संस्थान,भारत सरकार द्वारा सेहो पूर्वमे सिनियर फेलोशिप प्रदान कएल जा चुकल अछि।

एहि अवसर पर प्रसन्नता व्यक्त करैत मैथिली साहित्य संस्थान, पटनाक भैरव लाल दास एवं डॉ. शिव कुमार मिश्र कहलन्हि कि मैथिली भाषाक प्राचीन इतिहास पर अनुसंधान करबाक अत्यंत आवश्यकता अछि। मैथिली भाषा के प्राचीन साहित्य चर्यापद पर अखन धरि मैथिली केर भाषा वैज्ञानिक सभक द्वारा अनुसंधान नहि कएल गेल छल तैंs अन्य भाषाक विद्वान सभ एकरा बंगला, उड़िया एवं असमिया भाषाक रूप मानैत रहल छथि।

मैथिली साहित्य संस्थान, पटना द्वारा डॉ. झा सँ एहि विषय पर अनुसंधान करनबाक आग्रह कएल गेल छल आओर एहि विषय पर पछिला साल पटनामे एकटा व्याख्यान सेहो हिनका द्वारा प्रस्तुत कएल गेल छल। डॉ. झा कें एहि नवीन उपलब्धि पर समग्र मिथिला वासी एवं मैथिली भाषानुरागी हर्षित भs रहल छथि।

डाॅ झा मिथिलाक्षर साक्षरता अभियानी सेहो छथि, हुनकर एहि महान उपलब्धि पर मिथिलाक्षर साक्षरता अभियानक संस्थापक अजय नाथ झा शास्त्री अभियान दिशिसँ अभिनंदन करैत कहलनि जे, ‘ई उपलब्धि मैथिली भाषाकेँ शास्त्रीय दर्जा दियाबयमे सहायक सिद्ध होएत।’