मिथिलाक सरस्वती पूजा त’ जग भरिमे प्रसिद्ध अछि, मुदा महानगरमे सेहो आब वसंत पंचमीक शुभ अवसर पर सरस्वती पूजाक आयोजन, वृहत स्तर पर कएल जाइत अछि। मुम्बई उपनगर आ आसपासक क्षेत्रमे रहनिहार मैथिल जन सेहो, हर वर्ष एहि अवसर पर माता सरस्वतीक पूजन करैत छथि। महानगरक अनेको संगठन द्वारा एकर भव्य आयोजन कएल जाइत अछि। मिथिला मित्र मंडल जोगेश्वरी, मिथिला नवजीवन ट्रस्ट शहाड, बिहार मित्र मंडल नवी मुम्बई, विहार मित्र मंडल चेम्बूर, बिहारी एकता मंच चेम्बूर, संगहि उपनगरक नाला सोपारा, आ विरारमे बिहार सरस्वती पूजा समिति एवं संस्कार मिथिला फउंडेशन द्वारा हर वर्षक भांति एहि वर्ष सेहो भव्य पूजाक आयोजन कएल गेल। मीरा भाईंदर क्षेत्रमे सेहो कएक ठाम सार्वजनिक सरस्वती पूजनोत्सव अत्यंत हर्षोल्लासक संग मनाओल गेल। मीरा रोडमे ललित झा एंड एसोसिएट एवं मैथिली दर्पणक तत्वावधानमे हर वर्ष सरस्वती पूजाक आयोजन कएल जाइत अछि। तहिना चेम्बूर स्थित विश्वविनायक मंदिर प्रांगणमे विहार मित्र मंडल द्वारा हर वर्षक भांति एहि वर्ष सेहो सार्वजनिक सरस्वती पूजनोत्सव संपन्न भेल। संगहि चौबीस घंटाक अखंड हरिनाम संकीर्तन सेहो आयोजित कएल गेल। जाहिमे मुम्बई आसपासक अनेको कीर्तन मंडलीक सहभागिता देखल गेल। पूजन, हवन, भजन एवं भंडाराक उपरांत मंडलक तमाम कार्यकर्ता माता सरस्वतीक विदाई करैत एहि भव्य कार्यक्रममे अप्पन-अप्पन सहभागिता प्रस्तुत कएलनि। मंडलक अध्यक्ष धीरज रमेश मिश्र संगहि तमाम सेवाधारी जाहिमे, रमेश झा, गणेश झा, कृष्णकुमार झा, मोहन राय, सुरेंद्र झा, पप्पू मिश्र, संतोष चौधरी, धर्मेन्द्र झा, विद्यानंद झा, बलराम झा, नीलेश मिश्र संगहि मंडलक आनो आन सदस्य एहि कार्यक्रमक सफलताक लेल प्रयासरत छलथि। चेम्बूरमे बिहारी एकता मंच द्वारा सेहो हर वर्षक भांति सरस्वती पूजाक सफल आयोजन भेल। संस्थाक अध्यक्ष कौशल मिश्र, संगहि नारायण झा, प्रदीप मिश्र, गोकुल मिश्र, विश्वनाथ झा, शम्भू ठाकुर संगहि तमाम कार्यकर्ताक प्रयाससँ आयोजन सफल भेल। संस्था द्वारा भव्य सांस्कृतिक कार्यक्रमक आयोजन सेहो भेल, जाहिमे मिथिलाक प्रसिद्ध गायक कलाकार, राकेशजी जनकपुरियाक टीम आमंत्रित छलथि। जनतब दी जे, राकेश जनकपुरीया अनेको भाषामे गाबय लेल प्रसिद्ध छथि, तैं, कार्यक्रममे मैथिली, हिंदी, भोजपुरी संगहि मराठी गीत सेहो प्रस्तुत कएल गेल।
