विधानसभा क्षेत्रक पुरना जेलक समीप स्थित मिथिलांचल दुर्गा मंदिर परिसरमे रविदिन विधायक डॉ. आलोक रंजनक नेतृत्वमे स्वच्छता अभियान चलाओल गेल। प्रधानमंत्री नरेन्द्र मोदीक आह्वान पर शुरू भेल स्वच्छता अभियानमे पूर्व मंत्री सह विधायक डॉ. आलोक रंजनक संग-संग सैकड़ों कार्यकर्ता विशेष अभियानमे योगदान एवं सम्पूर्ण मंदिर परिसरक विशेष सफाई कयलनि। विधायक आलोक रंजन कहलनि जे, प्रधानमंत्री नरेंद्र मोदीक आह्वान पर आइसँ एकटा विशेष अभियान शुरू भऽ रहल अछि। जाहिमे देशक हर कोनासँ लोक उत्साहसँ भाग लऽ रहल छथि। देशक जनता सेहो २२ जनवरी केर अयोध्या राम मंदिरक प्राण-प्रतिष्ठाक संग पूरा देशमे दिपावली मनाबय केर निर्णय कयने छथि। एकर कारणसँ तैयारी भऽ रहल अछि। विशेष रुपसँ सब मठ, मंदिर, धार्मिक एवं सामाजिक स्थानक सफाई कयल गेल। एहि अवसर पर भाजपा नगर अध्यक्ष भैरव झा, वार्ड पार्षद रिंकू सिन्हा, नरेश पासवान, संतोष पोद्दार मुंगेरी, रणविजय यादव, अभिनव सिंह, सोनू गुप्ता, संतोष गुप्ता , अभिषेक सिंह, आदित्य ठाकुर, बबलू खान, बिट्टू झा, बादल कुमार सहित अन्यान्य लोक आ कार्यकर्ता उपस्थित छलाह।
