एखन पूरा देशमे राम मंदिर आ ‘इंडिया’ एलायंस (आई.एन.डी.आई.ए.) केर बैसारक खूब चर्चा चलि रहल अछि। ओतहि भाजपा प्रदेश अध्यक्ष सम्राट चौधरी रवि दिन एहि सभ मुद्दा पर मीडियासँ बातचीत केलथि। ओ कांग्रेस नेता राहुल गाँधी पर निशाना साधैत कहलनि “हुनका यात्रा निकाललासँ कोनो दिक्कत नहिं अछि, ओ बिहारक नेतासभक भविष्य बर्बाद कऽ देलन्हि। लालू यादवकेँ बचय केर लेल जे बिल छल, तकरा फारि देलनि, नीतीशक राजनीतिक जीवन सेहो बर्बाद भऽ गेल। राहुल गाँधीक सोच समाजवादी नेतासभकेँ राजनीतिसँ मुक्त करा रहल अछि।”
सम्राट चौधरी कहलनि जे “राहुल गांधी नीतीश कुमारकेँ संयोजक नहिं बनौलनि आ ममता बनर्जीक बहाना बना देल गेल अछि। ओ सभ नीतीश कुमारक राजनीतिक भविष्य खराब कऽ देलक। राहुल गांधीकेँ माफी यात्रा निकालबाक चाही।”
राहुल गाँधीक दादा-दादी, पिता ५० वर्ष धरि देशपर शासन कयलनि, मुदा देशक विकास नहिं भेल। क्षमा यात्रा एहि लेल निकालू। संगहि भाजपा प्रदेश अध्यक्ष कहलनि जे भाजपा राम मंदिरक प्राण-प्रतिष्ठाक लेल देशभरिमे अभियान चला रहल अछि। १४ जनवरीसँ २१ जनवरी धरि देशक सभ मन्दिरमे स्वच्छता अभियान चलायल जा रहल अछि। एहि अभियानक अन्तर्गत सम्राट चौधरी खाजपुराक शिव मन्दिरमे झाड़ूसँ सफाई कयलनि।
कांग्रेस अध्यक्ष मल्लिकार्जुन खड़गे शनिदिन पार्टीक विपक्षी दलक गठबंधनक नव अध्यक्ष चुनल गेलाह। गठबंधनक संयोजक पदक लेल जनता दल (यूनाइटेड) के प्रमुख नीतीश कुमारक नाम प्रस्तावित कैल गेल छल, मुदा अंतिम निर्णय ओहि दलसँ परामर्शक बाद लेल जायत जकर प्रतिनिधि बैसारमे उपस्थित नहिं छलाह। एखनो संयोजक पद पर कोनो निर्णय नहिं लेल गेल अछि।
