खड़गेक विवादित बयान, प्रधानमंत्रीकेँ ‘आतंकवादी’ आ एआईएडीएमके-भाजपा गठबंधनकेँ बतौलनि ‘खतरा’
चेन्नई। समदिया
कांग्रेस के राष्ट्रीय अध्यक्ष मल्लिकार्जुन खड़गे मंगलदिन चेन्नईमे आयोजित प्रेस ब्रिफिंगक दौरान भाजपा विशेष रूपसँ प्रधानमंत्री नरेंद्र मोदीकेँ निशाना बनौलनि। मुदा खड़गे सभ सीमा पार कय अलोकतांत्रिक राजनीतिक बयानबाजीक प्रयोग कयलनि, जाहिसँ विरोध भड़कि गेल। प्रेस ब्रिफिंगक दौरान कांग्रेसक राष्ट्रीय अध्यक्ष मल्लिकार्जुन खड़गे कहलनि जे, “ओ सभ (एआईएडीएमके) पीएम मोदीसँ कोना जुड़ि सकैत छथि? ओ आतंकी छथि आ समानतामे विश्वास नहि करैत छथि। हुनक पार्टी समानता आ न्यायमे विश्वास नहि करैत अछि। एहन लोकसँ जुड़ब लोकतंत्रकेँ कमजोर करब अछि।” कांग्रेस राष्ट्रीय अध्यक्ष भाजपाक नीति पर सवाल उठबैत आरोप लगौलनि जे केंद्र सरकार समाजमे असमानता बढ़ा रहल अछि आ संवैधानिक मूल्य कमजोर कय रहल अछि। ओ कहलनि जे, कांग्रेसक डीएमकेसँ गठबंधन मजबूतीसँ जारी रहत।
ओ विश्वास व्यक्त कयलनि कि ई कांग्रेस गठबंधन राज्यमे कल्याणकारी योजना, समावेशी विकास, गुणवत्तापूर्ण शिक्षा आ सुलभ स्वास्थ्य सेवाकेँ आगू बढ़ाबै लेल प्रतिबद्ध अछि।
अपन विवादित बयान जारी रखैत खड़गे आगू कहलनि कि प्रधानमंत्रीक रूपमे हुनका ई बुझबाक चाहि जे की कहबाक अछि आ की नहि कहबाक अछि, खास कय चुनावक दौरान, कारण एकर सीधा असर चुनावी प्रक्रिया पर पड़ैत अछि। ओ अपन सत्ता आ सरकारी मशीनरीक दुरुपयोग कय विपक्षी दलकेँ बदनाम कय रहल छथि। जखन कखनो मौका भेटैत अछि तँ व्यक्तिकेँ निशाना बना लैत छथि। ओ कहलनि जे, चुनाव आयोगकेँ एकर संज्ञान लेबाक चाही, मुदा ओ एहन करबामे असफल अछि। एहन बुझाइत अछि जे चुनाव आयोग हुनक प्रभावमे अछि। सीमांकनक संबंधमे जे शक्तिक मांग कय रहल छथि ओ सेहो हुनक नियंत्रणमे आबि जाएत। जँ ई प्रवृत्ति बनल रहत तँ भारतीय लोकतंत्र कमजोर भ जायत आ देशक जनताकेँ न्याय नहि भेटत।
