सचिनोसँ छोट अवस्थामे क्रिकेटमे तहलका मचाबैत रणजी डेब्यू कयलक समस्तीपुरक वैभव सूर्यवंशी 

पटना

*

बिहारक मिथिला क्षेत्र एखनि क्रिकेटमे कीर्तिमान पर कीर्तिमान कय रहल अछि। किछु दिन पुर्वहिं दरभंगाक सुशान्तक समाचार आयल छल, जे आइपीएलमे २•२० करोड़मे अनुबंधित भेलाह आ ओ रणजी ट्रॉफीक बाद एवं भारतक अंडर-१९ केर सेहो हिस्सा रहि चुकल छथि।

आब हालक दोसर कीर्तिमानक सूचना प्राप्त भेल जे बिहारक मिथिला क्षेत्रक समस्तीपुरक वैभव सूर्यवंशी साल भरिक अंदर क्रिकेटमे अपन प्रदर्शनसँ तहलका मचाबैत सचिनोसँ कम उम्रक रणजी ट्रॉफीमे डेब्यू करयवाला खिलाड़ी बनलाह।

मिथिला क्षेत्रीय बिहारक समस्तीपुर जिलाक ताजपुर प्रखंडक निवासी वैभव सूर्यवंशी मात्र १४ वर्षक आयुमे हलचल मचा देने छथि। वैभव सूर्यवंशी शुक्रदिन पटनाक मोइनुलहक स्टेडियममे रणजी ट्रॉफीमे पदार्पण कयलनि। वैभव मात्र १४ वर्षक आयुमे रणजी खेलब प्रारम्भ कयलनि। सचिन तेंदुलकर १५ साल आ २३२ दिनमे रणजी ट्रॉफीमे पदार्पण कयलनि। वैभव सूर्यवंशी बामा हाथक बल्लेबाज छथि आ अपन तेज बल्लेबाजी लेल जानल जाइत छथि। वैभवक नाम आइ पूरा देशमे चर्चाक विषय बनल अछि। वैभव मात्र १४ वर्षक आयुमे एक सालक भीतर विभिन्न मैचमे ४८ शतक आ ३ दोहरा शतकक संग रनक बरखा कयलक।

प्रतिभा नहिं तऽ उम्रक मोहताज होइत अछि आ ने संसाधनक। बिहारक १४ वर्षीय वैभव सूर्यवंशीक विषयमे सेहो एहने किछु कहल जा सकैत अछि। वैभव शुक्रदिन रणजी ट्रॉफी २०२४मे पदार्पण ओहि उम्रमे कयलनि जाहि उम्रमे बच्चासभ रबरक गेन्दसँ गलीमे बल्लेबाजी करैत अछि। बामा हाथक बल्लेबाज वैभव जखन शुक्रदिन पटनाक मोइन-उल-हक स्टेडियममे मुम्बईक विरुद्ध मैदान पर उतरल तऽ ओकर उम्र मात्र १४ साल छल।

आ एहिक संग वैभव ओ उपलब्धि प्राप्त कयलनि, जे सचिन तेंदुलकर सेहो नहिं कऽ सकल छलाह। वैभव सचिनसँ कम आयुमे प्रथम श्रेणी कैरियर शुरू करयवला भारतक इतिहासमे सबसँ कम आयुक रणजी पदार्पण करयवला व्यक्ति बनि गेल छथि।

रणजी ट्रॉफीमे खेलयवला सबसँ कम आयुक खेलाड़ीक बात करी तऽ अलीमुद्दीनक नाम शीर्ष पर अबैत अछि। ओ १९४२-४३ मे मात्र १२ साल ७३ दिनक आयुमे अपन करियरक शुरुआत कयलनि। अजमेरमे जन्मल अलीमुद्दीन ओहि मौसममे बड़ौदाक महाराजा प्रतापसिंह जिमखाना मैदानमे राजपूतानाक लेल खेललनि। दोसर नंबर पर एस के बोस १९५९-६०मे १२ साल आ ७६ दिनक आयुमे प्रथम श्रेणी क्रिकेटमे पदार्पण कयलनि, जखन कि तेसर स्थान पर रहनिहार मोहम्मद रिजवान १२ साल आ २४७ दिनक आयुमे १९३७ मे अपन पहिल रणजी ट्रॉफी मैच खेलेलनि।

वैभव सूर्यवंशी एहि साल बिहारक लेल कूच बिहार ट्रॉफी (अंडर-१९) मे पदार्पण कयलनि। आ झारखण्डक विरुद्ध एहि मुकाबलाक एकटा मैचमे वैभव मात्र १२८ गेन्दमे १५१ रन खेलि राज्य चयनकर्तासभक ध्यान आकर्षित कयलनि। मैचमे वैभव २२ चौका आ तीन छक्का मारलनि। ओ ओही मैचक दोसर पारीमे ७६ रन बनेलनि। एकर बाद ओ चारि देशक चतुष्कोणीय टूर्नामेंटमे ५३, ७४, ०, ४१, आ ० स्कोर कयलनि। एहि टूर्नामेंटमे इंग्लैण्ड अंडर-१९ आ बांग्लादेश अंडर-१९ टीम सेहो शामिल छल।