ट्रांसपोर्टरक हड़ताल सामान्य जनजीवनकेँ प्रभावित कए रहल अछि। देशक विभिन्न भागमे भोजन आ दूधक कमी भऽ गेल अछि। देशक विभिन्न पेट्रोल पम्प पर लोकक नमगर कतार देखल जा रहल अछि। जँ हड़ताल लम्बा समय धरि चलैत अछि तँ स्थिति खराब भऽ सकैत अछि। जनतब ई जे देश भरिक चालक हिट एंड रनक संबंधमे आनल गेल नव कानूनक विरोध कऽ रहल छथि।
ऑल इंडिया मोटर एंड गुड ट्रांसपोर्ट एसोसिएशनक अध्यक्ष राजेन्द्र कपूर कहलनि, “हमर एकमात्र मांग अछि जे सरकारकेँ सभ हितधारकसँ विचार-विमर्श कऽ मोटर वाहन अधिनियममे बदलाव करबाक चाही। एहि पर केकरो संग कोनो चर्चा नहिं भेल। आ ने किछु एकरा बारेमे किछु पूछल गेल। हमर संस्थानक कियो आन्दोलनक आह्वान नहिं केलक। मुदा एहि पर चर्चा करब बहुत जरूरी अछि। हड़तालसँ कहियो हल नहिं भेल अछि. हमरा विश्वास अछि जे सरकार अपन सदस्यसभसँ चर्चा कऽ एहि पर निर्णय लेत।
ट्रांसपोर्टर यूनियनक हड़तालक प्रभाव उत्तर भारतक पंजाबसँ मध्य भारतक महाराष्ट्र धरि देखल जा रहल अछि। एतय पेट्रोल टैंकर केर कमीक कारण बहुत रास पेट्रोल पंप खाली भऽ गेल छल। मानल जाइत अछि जे जँ एहने स्थिति बनल रहत तँ आबयवला दिनमे तरकारी आ दूधक दाम सेहो बढ़ि सकैत अछि। कतेको जिलामे मंगल साँझसँ तेलक आपूर्ति बन्दक भविष्यवाणी कयल गेल अछि।
महाराष्ट्रक नासिकमे परिवहन सङ्घक सचिव कहलनि जे तेल लऽ जा रहल टैंकरक चालक सेहो नव नियमक विरोध करबाक लेल उतरि गेल छथि। एहि कारणेँ तेलक आपूर्ति बाधित भऽ सकैत अछि। दोसर दिस, हिमाचलमे प्रदर्शनक कारण पर्यटन क्षेत्रकेँ सेहो पैघ झटका लागल अछि। एतय पर्यटकसभकेँ कैब बुक करबामे सेहो कठिनाईक सामना करय पड़ि रहल अछि। एतबे नहि, महाराष्ट्रक स्कूल बस मालिक संघक अध्यक्ष कहलनि जे जँ डीजलक आपूर्ति बन्द भऽ जायत तँ हमर स्कूल बस सेहो बन्द भऽ जायत, जाहिसँ बच्चासभक शिक्षापर प्रतिकूल प्रभाव पड़ि सकैत अछि।
केंद्र सरकार द्वारा आनल गेल नव हिट एंड रन कानूनक विरोधमे देशभरमे ट्रक-बस चालक पहिया के अवरुद्ध कऽ देलक अछि। चालक सभक माँग अछि जे ई कानून गलत अछि आ एकरा वापिस लेबाक चाही। ड्राइवरक हड़तालक कारण लोककेँ बहुत समस्याक सामना करय पड़ि रहल अछि। आवागमनमे लोककेँ बहुत समस्याक सामना करय पड़ि रहल अछि। माल परिवहनक कमीक कारण कतेको ठाम आवश्यक वस्तुक कमी भऽ गेल अछि आ किछु पेट्रोल पम्प पर पेट्रोल उपलब्ध नहिं अछि। कतेको ठाम पेट्रोलक कमी होयबाक अफवाह पसरि रहल अछि, जाहि कारणेँ कमी देखैत लोक अपन गाड़ीमे पेट्रोल भरि रहल छथि, एहिसँ पेट्रोल पम्प पर लम्बा कतार लागल अछि।
वाहन चालक तीन दिनक हड़तालक घोषणा केलखिन। चालकक कहब छनि जे जँ सरकार हुनकर माँग नहिं मानैत अछि तखन ई हड़ताल सेहो अनिश्चित भऽ सकैत अछि। गौरतलब अछि जे आईपीसीक स्थान पर सरकार एकटा नव भारतीय न्याय संहिता अधिनियम लागू कयलक अछि। अधिनियमक धारा १०४ मे प्रावधान अछि जे यदि कोनो व्यक्तिक मृत्यु लापरवाहीसँ गाड़ी चलयबाक कारण भऽ जायत अछि, तऽ एकरा गैर इरादतन हत्या मानल जायत आ चालककेँ पाँच सालक जेल आ जुर्माना लगाओल जा सकैत अछि। संगहि, एहि धारामे प्रावधान अछि जे यदि चालक लापरवाहीसँ गाड़ी चलयलाक बाद ककरो टक्कर मारि घटनास्थलसँ भागि जाइत अछि, पुलिसकेँ सूचित नहिं करैत अछि, तखन ओहि स्थितिमे चालककेँ १० साल धरि जेलक सजा आ जुर्माना देल गेल अछि। चालक एकर विरोध कऽ रहल छथि किएक तँ आईपीसीक अन्तर्गत जँ ककरो मृत्यु लापरवाहीसँ गाड़ी चलयबाक कारण होइत अछि तखन चालककेँ दू सालक जेल वा जुर्माना या दुनूक प्रावधान छल।
