आइ रवि, ०४ फरवरी २०२४ कें रंगकोसी कलाकार नीतीश कुमार झा के निर्देशनमे अपन प्रस्तुति देत। जाहिमे नाटक आ नुक्कड़ नाटक प्रस्तुत होयत। एकर अलावा रैंप शो सहित अन्य प्रस्तुति सेहो होएत। नीतीश कुमार झा भारतेंदु नाट्य अकादमी, लखनऊसँ रंगमंचमे स्नातक छथि आ देशक सुप्रसिद्ध युवा अभिनेता-निर्देशक छथि ।
‘भारतवर्ष’ नाटकक मंचन राष्ट्रपति भवनक आरबीसीटी सभागारमे होयत, लगभग ३० कलाकारसँ सजल एहि नाटकक लेखन आ संगीत-निर्देशन दीपक कुमार ठाकुर केनै छथि। भूत, वर्तमान आ भविष्य केर समेटने ई नाटक विकाससँ विकसित भारतक सपना केर साकार करबाक खिस्सा अछि ।
नाटकमे सहयोग निर्भय कर्तव्य, वंदना, शुभम कुमार, मुरचना फुकान आ राजीव रंजन झाक रहत ।
२०१८ मे स्थापित भेल रंगकोसीक निदेशक राजीव रंजन झा एहि संस्थाक प्रति लोक कलाक संवर्द्धन लेल सदैत आगू रहबाक लेल प्रयत्नशील छथि आ प्रतिवर्ष मिथिलाक सहरसा वार्षिक राजकमल महोत्सव करैत अछि। एहि बरख जूनमे रंगकोसी संस्कृति मंत्रालय, भारत सरकारक सहयोगसँ कोसी रंग महोत्सवक आयोजन कय रहल अछि।
