भू-माफिया गिरोह पर एक्शनमे 25 जगह पर रेड, पांच गिरफ्तार, ₹34 लाख कैश, करोड़ोंक जमीनक दस्तावेज आ 79 राउंड गोली बरामद
जमुई। समदिया
आर्थिक अपराध इकाई काल्हि एकटा भू माफिया आ कुख्यात अपराधीक खिलाफ पैघ कार्यवाही कयलक। एसटीएफक सहयोगसँ गिरोहक सरगना व शार्गिदसँ जुड़ल 25 स्थान पर एक संग छापामारी कयल गेल। छापामारीक दौरान भारी मात्रामे जमीनक दस्तावेज, लग्जरी वाहन, ₹34 लाख नकद आ राइफलक गोली बरामद कयल गेल।
गुड्डू यादव एक कुख्यात अपराधी, भूमि माफिया ऑपरेटिव आ जमुई जिला परिषदक अध्यक्ष दुलारी देवीक पतिक खिलाफ पैघ कार्यवाही कयल गेल अछि। आर्थिक अपराध थानामे एहि गिरोहमे शामिल 17 व्यक्तिक खिलाफ प्राथमिकी दर्ज कयल गेल अछि। ई गिरोह राजस्वक रिकॉर्डमे हेरफेर कय, फर्जी विक्रेताकेँ स्थापना कय आ जाली जमीन पंजीकरणक दस्तावेज बना कय अवैध तरीकासँ जमीन पर कब्जा कय लैत छल। आर्थिक अपराध इकाई द्वारा सत्यापनसँ पता चलल कि कुख्यात अपराधी गुड्डू यादव साल 2000 मे अपराधक दुनियामे प्रवेश कयलक। ओकरा जमुई, लखीसराय आ नवादा जिला केर विभिन्न थानामे 29 पंजीकृत मामिला केर सामना करय पड़ैत अछि, जाहिमे हत्या, हत्याक प्रयास, मारपीट, रंगदारी, अपहरण, जनसेवक पर हमला, हथियार अधिनियमक उल्लंघन आ जमीन हड़पब अछि। जमुई आ पड़ोसी जिलामे एही संगठित गिरोहक अन्य सदस्यक खिलाफ सेहो कतेको मामिला दर्ज अछि, जाहिमे भूषण यादव, ललन यादव, विपिन यादव, छोटू यादव, बाबूलाल यादव, शाहनवाज अली, नायर खान, प्रवीण मिश्र, मनोज यादव, सोनू यादव आ रघुनंदन यादव शामिल अछि। एहिमेसँ अधिकांश मामिलामे कोर्ट संज्ञान लेलक अछि। कुख्यात गुड्डू यादव अपन आ पत्नी दुलारी देवी जे जिला परिषदक अध्यक्ष छथि, जमुई आ सिकंदरक पंजीकरण कार्यालयमे 29टा संपत्ति पंजीकृत कयने छथि। जखन कि एहि संपत्तिक आधिकारिक सर्कल रेट ₹7.59 करोड़ अछि, मुदा गिरोहक प्रभावकेँ लाभ उठा ओहि मूल्यक एक तिहाई पर पंजीकृत कयल गेल, जाहिसँ सरकारी राजस्वसँ बचल गेल। गुड्डू यादवक आपराधिक सहयोगी सभ सेहो जमुई पंजीकरण कार्यालयमे अपन परिवारक सदस्यक नाम पर 61 कागजात दर्ज कयलक, जकर परिणाम फेरसँ सरकारी राजस्व चोरी भ गेल।
आर्थिक अपराध इकाई (ईओयू) जमुई जिला परिषदक अध्यक्ष दुलारी देवी आ हुनकर पति गुड्डू यादवक परिसरमे तलाशी लेलक जाहिमे 10 बैंकक खाताक पता चलल। एही मामिलाक सिलसिलामे ईओयू स्पेशल टास्क फोर्स (एसटीएफ) केर सहायतासँ कुख्यात गुड्डू यादव आ हुनक करीबी सहयोगीसँ जुड़ल 25 स्थान पर छापा मारलक। तलाशीक दौरान सिकंदर चौक स्थित गुड्डू यादवक आवाससँ ₹8,13,000 नकद आ जमीन खरीदसँ संबंधित 25 दस्तावेज आ समझौता बरामद कयल गेल। सिकंदरमे पेट्रोल पंपक कार्यालयसँ 14 जमीनक भूखंड, बैंकक पासबुक आ 79 राउंड राइफलक गोली आ संबंधित दस्तावेज जब्त कयल गेल। बरामद गोली बारूदक संबंधमे सिकंदर थानामे कानूनी कार्यवाही चलि रहल अछि। अन्य सहयोगीक आवास पर खोजला पर सेहो जमीनसँ जुड़ल भारी संख्यामे कागजात भेटल। राकेश कुमार उर्फ सोनू यादव, एहि मामिलाक प्रमुख आरोपीकेँ गिरफ्तार कयल गेल अछि।
आर्थिक अपराध इकाई केर एही पैघ ऑपरेशनमे एसपी रैंकक एगो अधिकारी, तीन अतिरिक्त पुलिस अधीक्षक (एएसपी), डीएसपी रैंकक 18 अधिकारी आ ईओयू आ एसटीएफक कर्मी केर एगो पैघ दल शामिल छल। कुल पांच आरोपीकेँ गिरफ्तार कयल गेल आ एहि अभियानक दौरान ₹34 लाखसँ बेसी नकदी बरामद कयल गेल। जमीन खरीदसँ जुड़ल काफी संख्यामे दस्तावेज सेहो जब्त कयल गेल।
