असमक मुख्यमंत्रीकेँ राहुल गांधीक चुनौती

जतेक चाही करु केश, डरब नहिं हम – राहुल गांधी

*

गुवाहाटी

*

गुवाहाटी पुलिस द्वारा भीड़केँ कथित रूपसँ भड़काबै केर आरोपमे राहुल गांधीक खिलाफ मामला दर्ज करय केर बाद राहुल गांधी बुधकेँ भाजपाक नेतृत्व वाला असम सरकारकेँ चुनौती देलनि कि ओ हुनका खिलाफ ‘जतेक चाहैथ केस दर्ज करैथ’, मुदा ओ डरयवाला नहिं छथि।

कांग्रेस नेता बारपेटा जिलामे भारत जोड़ो न्याय यात्राक सातम दिन अपन पहिल सार्वजनिक संबोधनमे असमक मुख्यमंत्री हिमंत बिस्वा सरमा पर कड़गर आक्रमण कयलनि।

ओ सरमाकेँ देशक सबसँ भ्रष्ट मुख्यमंत्री कहलनि आ भ्रष्टाचारक कतेको आरोप लगओलनि।

राहुल कहलनि “हम नहिं जनैत छी जे हिमंत बिस्वा सरमाकेँ कतय सँ धारणा भेल जे ओ पुलिस शिकायत दर्ज कऽ हमरा डरा सकैत छथि। जतेक भए सकय केस दाखिल करू। हम डरैत नहि छी। २५ टा आओर मामिला दर्ज करू। हम भाजपा-आरएसएससँ नहिं डरैत छी।”

गुवाहाटी पुलिस मंगलदिन राहुल गाँधी आ अन्य कांग्रेसी नेताक खिलाफ शिकायत दर्ज कयलक।

राहुल कहलनि “भाजपा-आरएसएसक उद्देश्य असमिया इतिहास, संस्कृति आ भाषाकेँ मिटायब अछि। हम हुनका नागपुरसँ असम पर शासन नहिं करय देब। असम असमेसँ चलत।

कांग्रेस नेताक अनुसार, असममे व्यापक भ्रष्टाचार अछि आ हिमंत बिस्वा सरमा देशक सबसँ भ्रष्ट मुख्यमंत्री छथि।

राहुल गांधी दावा केलथि, “ओ (सरमा) अहाँसँ गप्प करैत अहाँक जमीन लऽ लैत छथि। जखन अहां सुपारी खाइत छी तखन ओ सुपारी के कारोबार पर कब्जा कऽ लैत अछि। ओ काजीरंगा राष्ट्रीय उद्यानमे सेहो जमीन लेलनि आछि।”

ओ प्रधानमंत्री नरेन्द्र मोदी आ केन्द्रीय गृह मंत्री अमित शाह पर सेहो निशाना साधैत कहलनि जे हुनकालोकनिक हृदयमे बहुत घृणा अछि।