राहुल गाँधी आ प्रियंका गाँधी उत्तर प्रदेशक मुरादाबादसँ भारत जोड़ो न्याय यात्रा शुरू कयलनि। प्रियंका गाँधीकेँ चन्दौलीसँ यात्रामे शामिल होयबाक छल, मुदा खराब स्वास्थ्यक कारण ओ उपस्थित नहिं भऽ सकलीह। एहि यात्रामे प्रियंका गाँधी अमरोह, संभल, बुलंदशहर, अलीगढ़, हाथरस आ आगरा होइत फतेहपुर सीकरी तक संग रहतीह।
अखिलेश यादव २५ फरवरीकेँ आगरामे राहुल गाँधीक भारत जोड़ो न्याय यात्रामे शामिल होयताह। एकरा लेल कांग्रेसक तरफसँ अखिलेश यादवकेँ निमंत्रण पत्र देल गेल अछि।
उत्तर प्रदेश कांग्रेस अध्यक्ष अजय राय, कांग्रेसक वरिष्ठ नेता पीएल पुनिया आ अन्य नेता कांग्रेस अध्यक्ष मल्लिकार्जुन खड़गेक निमंत्रण पत्र देलनि अछि।
अखिलेश यादव २५ फरवरीकेँ दुपहरिया २ बजे राहुल गाँधीक आगरा यात्राक क्रममे सङ्ग रहताह। सपा आ कांग्रेस दुनू बुधदिन उत्तर प्रदेशमे लोकसभा चुनावक लेल अपन सीट बंटवाराक फार्मूलाक घोषणा कयने छल, जाहि अन्तर्गत कांग्रेस पार्टी १७ सीटपर चुनाव लड़त।
