लोकसभा चुनावसँ पहिने बेरोजगारी, मुद्रास्फीति आ सामाजिक न्यायसँ जुड़ल मुद्दाकेँ विमर्शक केन्द्रमे अनबाक लेल कांग्रेस रविदिनसँ राहुल गाँधीक नेतृत्वमे मणिपुरसँ अपन ‘भारत जोड़ो न्याय यात्रा’ शुरू करत। ई यात्रा १४ जनवरीकेँ मणिपुरक राजधानी इम्फालक समीप थोबलसँ प्रारम्भ होयत आ मार्चक तेसर सप्ताहमे मुम्बईमे समाप्त होयत। कांग्रेस कहलक जे ई यात्रा ६७ दिनमे १५ राज्य आ ११० जिलाकेँ कवर करत। ‘भारत जोड़ो न्याय यात्रा’क दौरान लगभग ६,७०० किलोमीटरक दूरी तय कयल जायत। यात्रा बेसीतर बससँ होयत, मुदा किछु ठाम पैदल सेहो होयत।
कांग्रेसक पूर्व अध्यक्ष राहुल गाँधी ७ सितम्बर २०२२ सँ ३० जनवरी २०२३ धरि कन्याकुमारीसँ कश्मीर धरि ‘भारत जोड़ो यात्रा’ निकाललनि। हुनकर १३६ दिनक पदयात्रा ४२ राज्य आ दूटा केंद्र शासित प्रदेशक ७५ जिला आ ७६ लोकसभा निर्वाचन क्षेत्रकेँ कवर करैत ४,०८१ किलोमीटरक दूरी तय कयने छल। कांग्रेसक कहब अछि जे ‘भारत जोड़ो न्याय यात्रा’ कोनो चुनावी यात्रा नहिं अछि, बल्कि ई देशक लेल न्यायक माँगक विषयमे अछि। एहि यात्राकेँ लोकसभा चुनावसँ पहिने बेरोजगारी, मूल्य वृद्धि आ सामाजिक न्यायसँ जुड़ल एकटा विमर्श ठाढ़ करय केर दृष्टिसँ देखल जा रहल अछि।
राहुल गाँधी शुक्रदिन दावा केने छलाह जे भारतीय जनता पार्टी आ राष्ट्रीय स्वयंसेवक संघ (आरएसएस) वास्तविक मुद्दासँ ध्यान हटाकऽ भावनात्मक मुद्दाक राजनीतिक दुरुपयोग कऽ रहल अछि। कांग्रेस महासचिव जयराम रमेश कहलनि जे राहुल गाँधी ‘भारत जोड़ो यात्रा’क दौरान “आर्थिक असमानता, ध्रुवीकरण आ तानाशाही”क मुद्दा उठौने छलाह, मुदा भारत जोड़ो न्याय यात्रा देशक लोकक लेल आर्थिक, सामाजिक आ राजनीतिक न्यायक माँग पर केन्द्रित होयत। भारत जोड़ो न्याय यात्रा मणिपुर, नागालैंड, अरुणाचल प्रदेश, असम, मेघालय, पश्चिम बंगाल, बिहार, झारखंड, ओडिशा, छत्तीसगढ़, उत्तर प्रदेश, मध्य प्रदेश, राजस्थान, गुजरात आ महाराष्ट्र होइत चलत।
पार्टीक अध्यक्ष मल्लिकार्जुन खड़गे आइ अर्थात १४ जनवरीकेँ इम्फालक समीपसँ यात्राकेँ झंडी देखा कऽ रवाना करताह। आगामी लोकसभा चुनावकेँ देखैत ई यात्रा राजनीतिक रूपसँ महत्वपूर्ण मानल जा रहल अछि। लोकसभा चुनाव एहि साल अप्रैल-मईमे होयबाक संभावना अछि। पार्टी संगठनक महासचिव के.सी. वेणुगोपाल हालहिमे कहने छलाह जे ई यात्रा महिला, युवा आ देशक वंचित समुदायक लोकसँ बातचीत करत। कांग्रेस कार्य समितिक २१ दिसंबरक बैसारमे पार्टीक नेता लोकनि एहि बातपर जोर देलनि जे राहुल गाँधीकेँ पूरबसँ पश्चिम तक दोसर चरणक यात्रा करय केर चाही। एकर बाद एहि यात्राक घोषणा कएल गेल अछि।
मणिपुरसँ यात्रा शुरू करबाक कारणक विषयमे पूछला पर वेणुगोपाल कहलनि जे ई देशक एकटा महत्वपूर्ण हिस्सा अछि आ पार्टी पूर्वोत्तर राज्यक लोकक “घाव पर मलहम लगाबय” केर प्रक्रिया शुरू करय चाहैत अछि। मणिपुरमे ३ मईकेँ हिंसा भड़कलाक बादसँ कुकी आ मेइती समुदायक बीच जातीय झड़पमे २०० सँ बेसी लोकक मृत्यु भऽ चुकल अछि,
संगहि ६०,००० सँ बेसी लोक बेघर भऽ गेल अछि। कांग्रेस विपक्षी गठबन्धन ‘इंडिया’ (भारतीय राष्ट्रीय जनतांत्रिक समावेशी गठबंधन)क अपन सहयोगी दलक नेतासभसँ ‘भारत जोड़ो न्याय यात्रा’मे शामिल होयबाक आग्रह कयलक अछि। भारत जोड़ो यात्रामे विभिन्न राजनीतिक दलक नेता लोकनि सेहो भाग लेलनि। भारत जोड़ो यात्राक अवधिमे गाँधी १२टा बैसार आ १०० सँ बेसी नुक्कड़ सभा कयलनि आ १३टा संवाददाता सम्मेलनकेँ सम्बोधित कयलनि।
