नहिं दैत छैक तऽ किएक नहिं दैत छैक, जँ दैत छैक तऽ कुर्सी बचाबय लेल देलनि, विपक्ष आखिर चाहैत की अछि ? बिहारकेँ सहायता भेटल तकर सराहना हेबाक चाही, मुदा राबड़ी देबीकेँ ई नहिं पसिन्न, हुनका बिहार छोड़ि देशक चिन्ता होबय लागल आ कहलीह जे बिहारेकेँ सहायता किएक भेटल, पुरा देशकेँ भेटय केर चाही।
बिहारकेँ विशेष दर्जाक माँग पर बहस चलि रहल अछि। राजद एहि मुद्दा पर मुख्यमंत्री नीतीश कुमारक विरोध करैत आबि रहल अछि। बजटकेँ लऽ कऽ केन्द्र सरकारपर सेहो हमला कयल जा रहल अछि।
बिहारक पूर्व मुख्यमंत्री राबड़ी देवी कहलनि जे प्रधानमंत्री मोदी अपन कुर्सी बचाबय लेल बजटमे दूटा राज्यक लेल धन आवंटित कयलनि अछि।
ओ कहलनि जे प्रधानमंत्री नरेन्द्र मोदी बजट २०२४ मे पूरा देशक उपेक्षा कयलनि। पाइ मात्र बिहार आ आन्ध्र प्रदेशक लेल आवंटित कयल गेल अछि। एकर पाछू हुनकर उद्देश्य अपन कुर्सी बचायब अछि। मुख्यमंत्री नीतीश कुमार पीएम मोदीसँ बिहारकेँ विशेष राज्यक दर्जा देबाक माँग कयने छलाह, मुदा ओ एखनि एकटा पैकेट थम्हा देलनि, ताहिसँ की होयत ?
“बिहार गरीब राज्य अछि। अईठाम कोनो कारखाना या कंपनी नहि अछि। एहन स्थिति मे गरीब के रोजगार कोना भेटत? सरकार के हुनका लेल एकटा कारखाना लगाबय के चाही। हुनका समय पर मजदूरी भेटबाक चाही।
राबड़ी देवी बिहारमे लगातार पुल ढहबाक मुद्दा पर नीतीश सरकार पर सेहो निशाना साधलनि। ओ कहलनि जे राज्यमे प्रतिदिन पुल ढहबाक समाचार भेटि रहल अछि। एखन धरि २० सँ बेसी पुल ढ़हि चुकल अछि। कोन ठेकेदार एहि पुलक निर्माण कए रहल अछि ? निविदा कखन जारी भेल छल ? ई सब केकर सरकारमे भेल ? ई सवाल हुनका सभसँ पूछल जेबाक चाही, मुदा लोक लालू प्रसाद यादव आ तेजस्वी यादवक पाछाँ अछि।
ओ आगू कहलखिन जे नीतीश कुमार बिहारकेँ धोखा देबाक काज कयलथि अछि। राज्यक जनता एकरा नीक जकाँ बुझने अछि। इन्दिरा आवास बनेबाक लेल पाइ काटल गेल। महंगाई कम नहिं भए रहल अछि। लालू प्रसादक स्वास्थ्य पर ओ कहलखिन कि हुनकर जांच कएल गेल अछि, हुनकर हालत पहिनेसँ नीक अछि।
