बिहारक पूर्व उपमुख्यमंत्री तेजस्वी यादव केंद्र आ बिहार सरकार पर बिहार लेल किछु नहिं करबाक सवाल उठौलनि, ताहि पर भाजपा आ जेडीयू सेहो राजद सरकारमे ११८ नरसंहारक लेखाजोखा देबाक माँग कयलक।
राजद नेता तेजस्वी यादव सोशल मीडिया प्लेटफॉर्म एक्स पर मोदी सरकार पर निशाना साधैत लिखलनि, “बिहार मोदी जीकेँ ४० मे सँ ३९ सांसद देलक। केंद्रमे १० सालसँ भाजपा सरकार, १७ सालसँ बिहारमे सरकार, केंद्रमे मंत्री, दिल्लीमे हिनक शासन, पटनामे हिनक शासन-प्रशासन। सीबीआई, ईडी, आईटी आ मीडियाक एकटा वर्ग हिनकर संग। तखनो बिहारक नौजवानकेँ रोजगार देब, विशेष दर्जा देब, विशेष पैकेज देब, बिहारमे उद्योग लगेबाक लेल आओर की चाही ?”
ओ आगू कहलनि जे एतेक सांसद आ डबल इंजन सरकारक बावजूद अहां बिहारकेँ किछु नहि दय, उल्टा बिहारीएकेँ भला-बुरा कहबा लेल बिहार अबैत छी तऽ एहि बेर बिहारी अहांकेँ कड़गड़ सबक सिखाओत।
तेजस्वीक एहि बयान पर जवाबी कार्रवाईमे भाजपा आ जेडीयू देरी नहिं कयलक।
जदयूक मुख्य प्रवक्ता नीरज कुमार लालू-राबड़ी शासनक याद दिआबैत कहलनि, “बिहारमे भेल ११८ नरसंहारक दिअ जवाब, माता-पिताक राजक दिअ हिसाब। जबाब आ हिसाबक बीच राजनीतिक जे दोसर पीढ़ी आयल अछि, तऽ के अछि ? एहिमे दलित, शोषित आ सामान्य समुदायक लोकक कत्लेआम मचि गेल छल। एकरा लेल के अछि जिम्मेदार।”
एम्हर भाजपा प्रवक्ता कुंतल कृष्ण सेहो तेजस्वी आ रोहिणी पर निशाना साधैत कहलनि जे हुनका बिहारक अगिला पीढ़ीकेँ इहो बतेबाक चाही कि हुनकर माता-पिताक १५ सालक शासनकालमे ११८ नरसंहार भेल छल। जिनकर नाम छल लालू राज-राबड़ी राज। वैऽह राज छल माफिया राज, गुण्डाराज, नरसंहारक राज आ ओही राजक राजकुमार आ राजकुमारी छथि ई दुनू।
