टेंडर घोटाला पर तेजस्वी यादव सरकारसँ पूछलनि सवाल, मुख्यमंत्री सम्राट चौधरीकेँ बतौलनि ‘अंगूठाछाप’

पटना। समदिया

पटनामे पत्रकार सम्मेलनक दौरान तेजस्वी यादव बिहार सरकार पर भ्रष्टाचार, निविदा प्रक्रिया आ राज्यक आर्थिक स्थितिसँ जुड़ल कतेको गंभीर आरोप लगौलथि। सरकारसँ कतेको सवाल करैत ओ निष्पक्ष जांच आ जवाबदेहीक मांग कयलनि। एही दौरान तेजस्वी यादव सम्राट चौधरीकेँ अंगूठाछाप मुख्यमंत्री बतौलनि आ बिहार टेंडर घोटालाकेँ ल कय कतेको सवाल पूछलनि। तेजस्वी कहलनि कि पूरा सीएमओ पर काबिज ओ लोक अछि जाहिसँ पुराना सिस्टम चलि रहल छल। सम्राट जी केँ कोनो मतलब नहि अछि। जे केंद्रसँ कहल जायत, ओहि पर स्टॉम्प ओ लगबैत छथि। ओ बड़का काफिला आ पैघ बंगलामे बस खुश छथि।

बिहारक राजनीतिमे एक बेर फेर आरोप आ जवाबी आरोपक आदान-प्रदान तेज भ गेल अछि। रविदिन राजद नेता तेजस्वी यादव पटनामे पत्रकार सम्मेलनमे राज्य सरकारक भीतर भ्रष्टाचारक संबंधमे कतेको गंभीर सवाल उठेलथि। ओ बतौलनि जे आब जनता बहुत दिनसँ सत्तामे रहल सरकारसँ जवाब मांगैत अछि।

तेजस्वी यादवक आरोप अछि कि सरकार भ्रष्टाचारक प्रति ‘जीरो टॉलरेंस’ केर बात करैत अछि, मुदा जमीनी वास्तविकता एकदम अलग अछि। ओ कहलनि कि कतेको मामिला सामने आयल अछि जाहिसँ उच्च पदस्थ अधिकारी आ प्रभावशाली हस्तीक भूमिका पर सवाल उठाओल गेल अछि, तहनो कार्यवाही निम्न स्तरक कर्मी धरि सीमित अछि।

तेजस्वी बिहारक आर्थिक स्थितिकेँ ल कय सरकार पर तंज कसलनि। ओ दावा कयलनि जे राज्यक राजस्वमे गिरावट आबि रहल अछि जखन कि ओकर कर्जक बोझ बढ़ि रहल अछि। हुनक आरोप अछि कि सरकार कर्मचारी केर वेतन, छात्रवृत्ति, आ जरूरतमंद लेल कल्याणकारी योजना लेल धनक कमी केर हवाला दैत अछि, तहनो भ्रष्टाचारक मामिलामे शामिल प्रमुख हस्तीक खिलाफ कार्यवाही नहि कय रहल अछि।

ओ इमरजेंसी फंडसँ ₹3,660 करोड़क निकासीक सेहो जिक्र कयलनि। तेजस्वी टिप्पणी कयलनि जे एहिसँ राज्यक आर्थिक स्वास्थ्यक संकेत भेटैत अछि।

एकटा विशिष्ट निविदा संबंधी मामिलाक जिक्र करैत तेजस्वी यादव एहि पूरा मामिलाक निष्पक्ष जांचक मांग कयलनि। हुनक आरोप छल कि किछु खास व्यक्तिकेँ प्रभावशाली लोकक सुरक्षा भेटल अछि। ओ सवाल उठेलथि जे एकटा व्यक्ति कतेको विभागमे निविदाकेँ प्रभावित करबामे सक्षम अछि।

ओ पूछलथि जे जांच एजेंसीक रिपोर्टमे तथ्य सामने अयलाक बाद सेहो वरिष्ठ अधिकारी आ जिम्मेदार लोकक खिलाफ कोनो कार्यवाही किया नहि कयल गेल। सृजन घोटाला, कैग रिपोर्ट आओर अन्य मुद्दाक हवाला दैत तेजस्वी सरकारसँ जवाब मांगलनि।

राजद नेता पुरान व्यवस्थाक सेहो आलोचना करैत कहलनि जे पहिने बिना घूस देने बहुत रास काज पूरा नहि भ सकैत छल। हुनक दावा छल कि हुनक पार्टी केर कार्यकालमे एही व्यवस्थाक संबंधमे कार्यवाही कयल गेल छल आ युवाकेँ रोजगारक व्यवस्था कयल गेल छल।

तेजस्वी यादव मुख्यमंत्री सम्राट चौधरीकेँ सेहो निशाना बनेलथि। ओ बयान देलनि जे जँ सरकारमे हिम्मत अछि तँ हुनक उठओल सवालक जवाब देबाक चाहि। ओ सरकारसँ कतेको बिंदु पर स्पष्टीकरण मंगलथि, ओ जोर दैत कहलथि जे आब जनता सभ मुद्दा पर जवाबदेहीक मांग करैत अछि।