कांग्रेस नेता राहुल गांधी बृहस्पति दिन दावा कयलनि जे प्रधानमंत्री नरेन्द्र मोदीक जन्म ओबीसी परिवारमे नहिं भेल छल आ ओ अपन पहिचान ओबीसी कहि लोकसभकेँ गुमराह कऽ रहल छथि। राहुल गांधी न्याय यात्राक दौरान ई आरोप लगौलनि अछि।
राहुल गाँधी ओडिशामे कांग्रेसक भारत जोड़ो न्याय यात्राक तेसर आ समापन दिन झारसुगुडामे संक्षिप्त भाषण दैत कहलनि जे मोदीक जन्म “एकटा एहन परिवारमे भेल छल जे सामान्य जातिक छल। मोदीजी ओबीसी कहि लोककेँ गुमराह कऽ रहल छथि। हुनकर जन्म तेली जातिक एकटा परिवारमे भेल छल, जकरा गुजरातमे भाजपा सरकारक कार्यकालमे २००० मे ओबीसी सूचीमे शामिल कयल गेल छल। तेँ मोदीजी जन्मसँ ओबीसी नहि छथि।”
आगू गप्प करैत राहुल गांधी पीएम मोदी पर एकटा आओर पैघ आरोप लगओलनि। ओ कहलनि जे प्रधानमंत्री कोनो ओबीसी व्यक्तिसँ हाथ नहिं मिलाबैत छथि, बल्कि अरबपतिसँ गला मिलबैत छथि।
कांग्रेसक पूर्व अध्यक्ष बृहस्पति दिन एतय पुरान बस स्टैंडसँ अपन यात्रा फेरसँ शुरू कयलनि आ एकटा खुजल जीपमे किसान चौक दिस बढ़लाह। हुनका संग एआईसीसी नेता अजाॅय कुमार आ ओपीसीसी अध्यक्ष शरत पटनायक सेहो छलाह। ई यात्रा दुपहरियामे ओडिशासँ छत्तीसगढ़मे प्रवेश कयल।
