नासिकमे प्रधानमंत्री नरेन्द्र मोदी कयलनि २७म राष्ट्रीय युवा महोत्सवक उद्घाटन

नासिक

*

प्रधानमंत्री नरेन्द्र मोदी नासिकमे २७म राष्ट्रीय युवा महोत्सवक उद्घाटन कयलनि। युवा लोकनि प्रधानमंत्री नरेन्द्र मोदीक उपस्थितिमे मार्च पास्ट कयल। एहि अवसर पर सीएम एकनाथ शिंदे, केंद्रीय मंत्री अनुराग ठाकुर सहित कतेको नेता उपस्थित छलाह।

प्रधानमंत्री नरेन्द्र मोदी कहलनि, “आइ भारतक युवा शक्तिक दिन अछि। ई दिन ओहि महापुरुषकेँ समर्पित अछि जे गुलामीक कालमे भारतकेँ नव ऊर्जासँ भरि देलनि। स्वामी विवेकानन्दक जयन्ती पर नासिकमे रहबाक सौभाग्य हमरा प्राप्त भेल, अहाँ सभगोटेकेँ हम राष्ट्रीय युवा दिवसक शुभकामना दैत छी।”

पीएम मोदी कहलखिन, “हम आह्वान केने छलहुं जे २२ जनवरी तक हमसब देशक सब तीर्थ स्थलक मंदिरक साफ-सफाई करी, स्वच्छता अभियान चलाबी। आइ हमरा कलाराम मन्दिर जयबाक आ मन्दिर परिसरक सफाई करबाक सौभाग्य भेटल।”

मोदी कहलनि, “हमर देशक ऋषि-मुनि-संतसँ लऽ कऽ आम आदमी आदमी धरि सब कियो युवा शक्तिकेँ सदैव सर्वोपरि रखलक। श्री अरबिन्दो कहैत छलाह जे जँ भारतकेँ अपन लक्ष्य पूरा करय केर छैक, तऽ भारतक युवाकेँ स्वतंत्र सोचक संग आगू बढ़य पड़त। स्वामी विवेकानन्द सेहो कहैत छलाह जे भारतक आशा भारतक युवाक चरित्र आ प्रतिबद्धता पर टिकल अछि। श्री अरबिन्दो आ स्वामी विवेकानन्दक ई मार्गदर्शन आइ २०२४ मे भारतक युवा सभक लेल एकटा पैघ प्रेरणा अछि।”

आगू नरेन्द्र मोदी कहलनि, “समय निश्चित रूपसँ सबकेँ अपन जीवनकालमे एकटा स्वर्णिम अवसर दैत अछि। भारतक युवाक लेल ओ स्वर्णिम अवसर आब अछि, ई अमृतकालक काल अछि। आइ अहाँकेँ इतिहास बनेबाक अवसर भेटल, इतिहासमे अपन नाम दर्ज करबाक अवसर भेटल। अहाँकेँ एहन काज करबाक चाही जे अगिला शताब्दीमे ओहि समयक पीढ़ी अहाँकेँ याद करय। अहाँ भारत आ पूरा विश्वक इतिहासमे अपन नाम स्वर्ण अक्षरमे लिखि सकैत छी, तेँ हम अहाँकेँ २१म शताब्दीक भारतक सबसँ भाग्यशाली पीढ़ी मानैत छी।”

पुनः प्रधानमंत्री नरेन्द्र मोदी कहलनि, “देशक कोन-कोनसँ युवा जाहि गतिसँ ‘मेरा युवा भारत संगठन’मे शामिल भऽ रहल छथि, ताहिसँ हम सेहो बहुत उत्साहित छी। हमर ‘युवा भारत संगठन’क स्थापनाक बाद ई पहिल युवा दिवस अछि।एखनि एहि संस्थाक गठनक ७५ दिन सेहो नहिं भेल अछि आ लगभग १.१० करोड़ युवा एहिमे अपन नाम दर्ज कय लेलनि।”

केंद्रीय मंत्री अनुराग ठाकुर कहलनि, “मोदी-मोदी के ई गूंज मात्र भारतमे नहिं बल्कि दुनियाक हर कोनामे अछि। आइ हमरा सबहक बीच एकटा एहन नेता छथि जे हमरा सभकेँ विकसित भारत बनेबाक लक्ष्य देलनि अछि। हमरासभक सामने सबसँ पैघ लक्ष्य विकसित भारतक निर्माण करब अछि। विवेकानन्द जी कहैत छलाह जे कोनो लक्ष्य निर्धारित करू आ दिन-राति ओहि लक्ष्य पर विचार करू, ओ काज करू जे अहाँकेँ अपन लक्ष्य दिस लऽ जाय आ आन सभ सपना बिसरि जाउ, तखन ओ लक्ष्य पूरा होइत देखब। मनुष्यक संकल्पसँ पैघ कोनो लक्ष्य नहिं अछि। तेँ प्रधानमंत्री मोदी सेहो हमरा सभकेँ विकसित भारत बनेबाक लक्ष्य देलनि अछि। आइ हम नव भारतक एकटा उज्ज्वल चित्र देखैत छी। तीन मासक बाद जखन मोदी तेसर बेर प्रधानमंत्री बनताह तखन हम दुनियाक तेसर सबसँ पैघ अर्थव्यवस्था बनि जाएब।”

एहिसँ पहिने प्रधानमंत्री नरेन्द्र मोदी महाराष्ट्रक नासिकमे रोड शो कयलनि। ओ शहरक श्री कालाराम मन्दिरमे पूजा-अर्चना कयलनि आ एतय राष्ट्रीय युवा महोत्सवमे भाग लेलनि। प्रधानमंत्री मोदी कलाराम मंदिरमे वाद्य यंत्र सेहो बजौलनि।