प्रधानमंत्री मोदीकेँ भेटल भूटानक सर्वोच्च नागरिक सम्मान

पुरस्कार प्राप्त करनिहार पहिल विदेशी राष्ट्राध्यक्ष
*
नई दिल्ली
*

भूटानमे प्रधानमंत्री नरेन्द्र मोदीकेँ सर्वोच्च नागरिक सम्मानसँ सम्मानित कयल गेल अछि। ओ भूटानमे ई सम्मान प्राप्त करयवला पहिल व्यक्ति छथि जिनका दोसर देशक प्रमुखक रूपमे ई प्रतिष्ठित पुरस्कार देल गेल अछि। भूटानमे एखन धरि भूटानी व्यक्तित्वकेँ ‘ऑर्डर ऑफ द आइके ग्याल्पो’ देल जा चुकल अछि। भूटान नरेश जिग्मे खेसर नामग्याल वांगचुक मोदीक यात्राक पहिले दिन हुनका एहि पुरस्कारसँ सम्मानित कयल।

एखन धरि मात्र चारिटा प्रतिष्ठित व्यक्तिकेँ ई पुरस्कार देल गेल अछि। प्रधानमंत्री नरेन्द्र मोदी कहलनि जे ई १४० करोड़ भारतीयक सम्मान अछि। प्रधानमंत्री मोदी एहि लेल भूटानक राजाकेँ धन्यवाद देलनि। जनतब जे ई पुरस्कार मात्र भूटानक स्थापित पदक लेल देल देल जाइत अछि। एकरा लाइफ टाइम अचीवमेंट अवार्ड मानल जाइत अछि। ई पुरस्कार भूटानक ६८म खेम्पो तेनजिन डेट्पकेँ २००८ मे देल गेल छल। एकर अतिरिक्त २०१८ मे खेंपो जुलकू न्गावांग जिग्मे चोएनकेँ देल गेल। जे खेंपो भूटानक केन्द्रीय मठ निकायक प्रमुख छथि। बतबैत चली जे प्रधानमंत्री नरेन्द्र मोदी शुक्रदिन भूटान पहुँचलाह आ हुनक गर्मजोशीसँ स्वागत कयल गेल। भूटानी युवाक एकटा समूह पारम्परिक भारतीय परिधान पहिरने शुक्रदिन प्रधानमंत्री मोदीकेँ देशमे स्वागत कयलक आ हुनक लिखल गरबा गीत पर नृत्य कयलक। एहिसँ पहिने प्रधानमंत्री मोदी ‘पड़ोस प्रथम’क नीतिक अन्तर्गत भूटानक सङ्ग भारतक अद्भुत सम्बन्धकेँ आओर मजबूत करबाक उद्देश्यसँ दू दिवसीय राजकीय यात्रापर भूटान पहुँचलाह। अधिकारी लोकनि कहलनि जे एहि यात्राक दौरान मोदीक विशेष स्वागत कयल गेल। भूटानी युवासभक एकटा समूह हालहिमे मोदी द्वारा लिखल एकटा गीत पर गरबा प्रस्तुत कयलक। मोदी हुनका लोकनिकेँ नाचैत देखलनि आ प्रस्तुतिक अन्तमे हुनका लोकनिक लेल ताली बजौलनि। पारो हवाई अड्डा पर पहुँचला पर प्रधानमंत्रीक जोरदार स्वागत कयल गेल। हवाई अड्डा पर भूटानक प्रधानमंत्री रोरिंग टोबगे हुनक स्वागत कयलनि। पारो अन्तर्राष्ट्रीय हवाई अड्डासँ थिम्पू धरि ४५ किमी दूर लम्बा बाटकेँ भारत आ भूटानक राष्ट्रीय ध्वजसँ सजाओल गेल छल आ बाटक दुनू तरफ ठाढ़ भूटानक जनता मोदीक गर्मजोशीसँ स्वागत कयलक।