प्रदर्शन कय रहल अभिजीत दीपके पर थप्पड़क बरसात, पुलिस लेलक हिरासतमे
जयपुर। समदिया
दूटा युवक काल्हि अचानक ‘कोकरोच जनता पार्टी’ केर संस्थापक अभिजीत दीपके पर हमला कयलक। भीड़मे सँ बाहर निकलैत दुनू युवक अचनाक थप्पड़ मारलक। कोकरोच जनता पार्टी नीट पेपर लीक, शिक्षा प्रणाली सुधार, बेरोजगारी आ छात्र आओर युवाकेँ प्रभावित करय वला अन्य चिंता जँका मुद्दाकेँ संबोधित करैत विरोध प्रदर्शन कयने छल। विरोध प्रदर्शन केर दौरान केंद्रीय शिक्षा मंत्री धर्मेन्द्र प्रधानक इस्तीफाक मांग सेहो कयल गेल।
भाजपाक राष्ट्रीय प्रवक्ता आशुतोष रांका केर कहनाय छनि जे शिक्षासँ जुड़ल मुद्दा आब सिर्फ परीक्षाक गड़बड़ी धरि सीमित नहिं अछि, छात्र, युवा आ अभिभावक बेहतर आ पारदर्शी व्यवस्थाक मांग कय रहल छथि। ओ शिक्षा व्यवस्थामे व्यापक सुधार आ जवाबदेही स्थापित करबाक आह्वान दोहरेलनि।
अभिजीत दीपके रविदिन देर राति जयपुर पहुंचल छलाह। जयपुर पुलिस विशिष्ट शर्तक अधीन विरोध प्रदर्शनक अनुमति द देने छल। प्रशासन एहि आयोजन लेल अधिकतम 800 लोकक उपस्थिति अधिकृत कय आयोजककेँ कानून व्यवस्था वा यातायात प्रवाहमे बाधा नहि पहुंचेबाक निर्देश देने छल।
विरोध प्रदर्शन लेल जयपुर गेल अभिजीत दीपके बतौलनि जे कोकरोच जनता पार्टीक उत्पत्ति सोशल मीडिया पोस्टसँ भेल अछि। हुनक अनुसार सुप्रीम कोर्ट केर तत्कालीन मुख्य न्यायाधीश केर टिप्पणीक बाद ‘कोकरोच’ शब्द केर प्रमुखता भेटल। एकर बाद सोशल मीडिया प्लेटफॉर्म एक्स पर एगो पोस्टक माध्यमसँ पार्टीक गठनक घोषणा कयलक। दीपके दावा कयलक कि ओही समय हुनक सोशल मीडिया अकाउंट पर 20,००० सँ बेसी फॉलोअर्स छल आ भारी संख्यामे युवा हुनक विचारक समर्थन कयलक।
जनतब दी जे पार्टी एहिसँ पहिने दिल्लीक जंतर मंतर, पुणे, लखनऊ, अमृतसर, बेंगलुरु आओर हैदराबाद सहित कतेको शहरमे विरोध प्रदर्शनक आयोजन कय चुकल अछि। संस्थाक कहनाय अछि जे ओ शिक्षा प्रणालीक भीतर पारदर्शिता आओर जवाबदेहीक मांग करैत देशव्यापी अभियान चला रहल अछि।
