प्रधान इस्तीफा देथुन, 22 लाख बच्चाक भविष्य दांव पर आ प्रधानमंत्री चुप : राहुल गांधी

नई दिल्ली। समदिया

नीट-यूजी परीक्षामे कथित पेपर लीककेँ ल कय राजनीति तेज भ गेल अछि। रविदिन लोकसभामे विपक्षक नेता राहुल गांधी केंद्र सरकार आ शिक्षा मंत्री धर्मेन्द्र प्रधान पर निशाना साधैत कहला जे जा धरि शिक्षा मंत्री इस्तीफा नहि देत आ परीक्षा प्रणाली पूर्ण रूपसँ सुरक्षित नहि भ जाएत ता धरि कांग्रेस आराम नहि करत।

राहुल गांधी सोशल मीडिया प्लेटफॉर्म एक्स पर हैदराबादमे छात्र विरोधक वीडियो शेयर कयलनि, विरोध करय वला छात्र नीट पेपर लीकक खिलाफ नारा लगा रहल छलाह आ शिक्षा मंत्री धर्मेन्द्र प्रधानक इस्तीफाक मांग कय रहल छलाह। प्रधानमंत्री नरेंद्र मोदी आ केंद्र सरकारक खिलाफ सेहो नारा लगाओल गेल। अपन पोस्टमे राहुल गांधी कहलनि कि जखनि लाखो युवा सड़क पर अछि, 22 लाख छात्रक भविष्य दांव पर लागल अछि आ प्रधानमंत्री चुप रहय तँ ई साफ-साफ पता चलैत अछि कि सरकार एकर जवाब दै केर बजाय टाल-मटोल करय केर कोशिश कय रहल अछि।

ओ कहलनि, जा धरि धर्मेन्द्र प्रधान इस्तीफा नहि द देताह आ नीट सन कागज लीक नहि होय ताहि लेल मजबूत आ फुलप्रूफ व्यवस्था लागू नहि भ जायत ता धरि कांग्रेस अपन संघर्ष जारी राखत। जनतब अछि जे कांग्रेस नीट-यूजी परीक्षा रद्द भेलाक बाद शिक्षा मंत्रीसँ इस्तीफाक मांग लगातार करैत आबि रहल अछि। विपक्षक आरोप अछि जे सरकार परीक्षा प्रणालीमे पारदर्शिता आ सुरक्षा बनेबामे असफल रहल अछि।

एहि बीच महाराष्ट्रक मुख्यमंत्री देवेन्द्र फडणवीस राजग सरकारक पतन पर राहुल गांधीक बयान पर जवाबी हमला कयलनि। नागपुरमे मीडियासँ बात करैत फडणवीस कहलनि जे राहुल गांधीक इ बात “मुंगेरीलालक मधुर सपना” जकाँ अछि। ओ कहलनि जे राहुल गांधीक इ दावा जे मोदी सरकार एक सालक भीतर खसत, ओ पूर्ण कल्पना आ दिवास्वप्न अछि।

फडणवीस वेयरहाउस लॉजिस्टिक्स पार्कक उद्घाटनक लेल नागपुरमे छलाह, जतय केंद्रीय मंत्री नितिन नबीन आ गडकरी सेहो मौजूद छलाह। ओ कहलनि जे महाराष्ट्रक नव लॉजिस्टिक्स नीतिक कारण नागपुर देशक एकटा पैघ लॉजिस्टिक्स केंद्र बनि रहल अछि। मुख्यमंत्री कहलनि कि आधुनिक लॉजिस्टिक्स पार्ककेँ निर्माणसँ  औद्योगिक लागतमे कमी आबय वला अछि आ वैश्विक आपूर्ति श्रृंखलामे भारतीय कंपनीकेँ बेसी प्रतिस्पर्धी बनाबय लेल काज कयल जायत।