प्रधानमंत्री नरेन्द्र मोदी शनिदिन वित्त मंत्री निर्मला सीतारमण द्वारा प्रस्तुत केन्द्रीय बजटकेँ “भारतक भविष्यक निर्माणक बजट” बतौलनि आ कहलनि जे ई बजट विकसित भारतक चारु स्तम्भ – युवा, गरीब, महिला आ किसानसभकेँ सशक्त बनओत।
एहि शानदार बजटक लेल वित्त मंत्री निर्मला सीतारमणकेँ बधाई दैत प्रधानमंत्री मोदी कहलनि जे ई बजट २०४७क विकसित भारतक नींव मजबूत करबाक गारंटी अछि।
ओ कहलनि जे एहि बजटमे युवा भारतक युवा आकांक्षाक ध्यान राखल गेल अछि। गरीब आ मध्यम वर्गकेँ सशक्त बनयबाक लेल हुनका लेल आमदनीक नव अवसर पैदा करबा पर जोर देल गेल अछि।
प्रधानमंत्री कहलनि जे आजुक अंतरिम बजट समावेशी होयबाक संग-संग इनोवेटिव सेहो अछि। एहि बजटमे निरंतरताक विश्वास अछि।
ओ कहलनि जे आइ घोषित नव आयकर योजनासँ मध्यम वर्गक एक करोड़ लोककेँ बड्ड राहत भेटत। पूर्ववर्ती सरकारसभ दशक धरि आम लोकक माथ पर एहि विशाल तलवारकेँ लटका कऽ रखलक।
ओ आगू कहलनि जे हुनकर सरकार एकटा पैघ लक्ष्य निर्धारित करैत अछि, ओकरा प्राप्त करैत अछि आ फेर ओहूसँ पैघ लक्ष्य अपन लेल निर्धारित करैत अछि।
ओ कहलनि जे गाम आ शहरमे गरीबक लेल ४ करोड़सँ बेसी घर बनाओल गेल आ आब ओ २ करोड़ आओर घर बनयबाक लक्ष्य रखलनि अछि। ओ २ करोड़ लखपति दीदी बनयबाक लक्ष्य रखने छलाह, आब ई बढ़ा कऽ ३ करोड़ कय देल गेल अछि।
